ప్రముఖ మైక్రో బ్లాగింగ్ సంస్థ ట్విట్టర్ కీలక నిర్ణయం తీసుకుంది. న్యూయార్క్, శాన్ఫ్రాన్సిస్కోల్లో ఉన్న సంస్థ కార్యాలయాలను తాత్కాలికంగా మూసేస్తున్నట్లు ప్రకటించింది. అమెరికా సెంటర్స్ ఫర్ డిసీజ్ కంట్రోల్ ప్రివెన్షన్ (సీడీసీ) తాజా మార్గదర్శకాలకు అనుగుణంగా ఈ నిర్ణయం తీసుకున్నట్లు వెల్లడించింది. రెండు వారాల క్రితమే (జులై 12న) ట్విట్టర్ ఆఫీస్ను పునఃప్రారంభించడం గమనార్హం.
కరోనా డెల్టా వేరియంట్ విజృంభణ భయాలతో.. సీడీసీ తాజాగా నూతన మార్గదర్శకాలను జారీ చేసింది. టీకా తీసుకున్న వ్యక్తులు ఇంట్లో, బయట మాస్క్లు ధరించడం తప్పనిసరికాదంటూ.. ఇంతకు ముందు చేసిన ప్రకటనను కూడా వెనక్కి తీసుకుంది. వ్యాక్సిన్ తీసుకున్నప్పటికీ.. బహిరంగ ప్రదేశాల్లో, రద్దీగా ఉండే ఇండోర్ ప్రాంతాల్లోనూ మాస్క్ ధరించాలని సూచించింది.
ఇతర టెక్ కంపెనీలు కూడా నూతన మార్గదర్శకాలకు అనుగుణంగా నిర్ణయాలు తీసుకుంటున్నాయి. ఈ ఏడాది చివరి నాటికి కార్యాలయాలకు తిరిగి వచ్చే ముందే.. ఉద్యోగులందరికి టీకా పంపిణి పూర్తి చేయాలని సీడీసీ సూచించినట్లు.. గూగుల్, ఆల్ఫాబెట్ సీఈఓ సుందర్ పిచాయ్ తెలిపారు.
అమెరికా వ్యాప్తంగా ఉన్న 270స్టోర్లలో వినియోగదారులు, సిబ్బంది తప్ప కుండా మాస్క్ ధరించేలా చూడాలని.. సీడీసీ మార్గదర్శకాలు జారీ చేసినట్లు యాపిల్ వెల్లడించింది. అమెజాన్, ఫేస్బుక్ వంటి కంపెనీలు ఈ మార్గదర్శకాల గురించి ప్రకటించాయి.
స్ట్రీమింగ్ దిగ్గజం నెట్ఫ్లిక్స్కు కూడా ప్రొడక్షన్లో నటీ-నటులు, సిబ్బందికి వ్యాక్సినేషన్ తప్పనిసరి చేసింది సీడీసీ. ఈ విషయాన్ని నెట్ఫ్లిక్స్ కూడా స్పష్టం చేసింది.
ఇదీ చదవండి: ఆ సంస్థలో కొత్తగా లక్షా 30 వేల ఉద్యోగాలు- ఏడాదిలోనే..
