పెట్రోల్​ బంకుల ఏర్పాటుకు అదానీ-టోటల్ యత్నాలు

దేశంలో పెట్రోల్ బంకులు ఏర్పాటు చేసేందుకు ప్రభుత్వం అనుమతి కోరనున్నట్లు అదానీ-టోటల్ జాయింట్ వెంచర్ ప్రకటించింది. లైసెన్సుల కోసం దరఖాస్తు చేయనున్నట్లు తెలిపింది.

ఫ్రెంచ్​ సంస్థ టోటల్​, అదానీ గ్రూప్​ కలయికతో నూతనంగా ఏర్పాటైన జాయింట్ వెంచర్.. భారత్​లో పెట్రోల్ బంకుల ఏర్పాటు విషయమై ప్రభుత్వం అనుమతులు కోరనుంది.

టోటల్-అదానీ ఫ్యూయెల్స్ మార్కెటింగ్ లిమిటెడ్ పేరుతో ఏర్పాటైన ఈ జాయింట్ వెంచర్​.. రిటైల్ అవుట్​లెట్ల ద్వారా అమ్మకాలు జరిపేందుకు లైసెన్సుల కోసం దరఖాస్తు చేయనున్నట్లు అదానీ గ్యాస్ సీఈఓ సురేశ్ మంగ్లానీ తెలిపారు.

నేచురల్ గ్యాస్, పెట్రోల్, డీజిల్ ఇంధనాలతో పాటు విద్యుత్ వాహనాలకు ఛార్జింగ్ సౌకర్యాలను కల్పించేందుకు 'టోటల్-అదానీ' కసరత్తులు చేస్తోంది. రిటైల్ ఇంధన రంగంలో సరళీకృత విధానాలవైపు ప్రభుత్వం అడుగులు వేస్తున్న నేపథ్యంలో ఈ నిర్ణయం తీసుకున్నట్లు సంస్థ వెల్లడించింది. గతేడాదే 'అదానీ గ్యాస్​'లో 37.5 శాతం వాటాలను టోటల్ సొంతం చేసుకుంది.

రూ.250 కోట్ల నికర విలువ ఉన్న సంస్థలకు భారత్​లో పెట్రోల్ బంకులు ఏర్పాటు చేసేందుకు అనుమతులు ఇవ్వనున్నట్లు గతేడాది కేంద్రం ప్రకటించింది.

ప్రభుత్వానివే...

ప్రస్తుతం దేశంలో 69,924 పెట్రోల్ బంకులు ఉన్నాయి. ఇందులో చాలా వరకు ఇండియన్ ఆయిల్ కార్పొరేషన్(29,368), భారత్ పెట్రోలియం(16,492), హిందూస్థాన్ పెట్రోలియం(16,707) వంటి సంస్థల ఆధ్వర్యంలో నడుస్తున్నాయి. రిలయన్స్ ఇండస్ట్రీస్, నయారా ఎనర్జీ, రాయల్ డచ్ షెల్ వంటి ప్రైవేట్ సంస్థలు మిగిలిన బంకులను నిర్వహిస్తున్నాయి.