లాక్డౌన్ ఆంక్షల ఎత్తివేత అనంతరం భారత్‌ ఆర్థిక వ్యవస్థ పుంజుకోవడం ప్రారంభమైనా.. మూడో త్రైమాసికం (అక్టోబరు- డిసెంబరు) నుంచి ఆ ఒరవడి నెమ్మదిస్తుందని ఆక్స్ఫర్డ్ ఎకనామిక్స్ అంచనా వేసింది. ఆసియాలోనే అత్యంత నెమ్మదిగా పుంజుకునే ఆర్థిక వ్యవస్థగా భారత్‌ నిలుస్తుందని తెలిపింది. కరోనా వైరస్‌ వ్యాప్తికి ముందున్న వృద్ధి స్థాయిలను అందుకోవడానికి దిగ్గజ ఆర్థిక వ్యవస్థల్లో భారత్‌ ఆర్థిక వ్యవస్థే ఎక్కువ సమయం తీసుకునే అవకాశం ఉందని పేర్కొంది. 'ఇండియా: ఏ రీఓపెనింగ్‌ గాన్‌ రాంగ్‌' పేరుతో రూపొందించిన నివేదికలో పై విషయాలను ఆక్స్ఫర్డ్ ఎకనామిక్స్ వెల్లడించింది. ఆర్థికవ్యవస్థ మళ్లీ ప్రయాణాన్ని ప్రారంభించడానికి కేంద్ర ప్రభుత్వం చేపట్టిన చర్యల ప్రభావం జూన్‌లో ఉన్నా, ఇప్పుడు కనిపించడం లేదని తెలిపింది. 'మూడో త్రైమాసికం తర్వాత నుంచి ఆర్థిక వ్యవస్థ పుంజుకోవడం నెమ్మదించవచ్చని మా ప్రాథమిక అంచనా.
ఆర్థికవ్యవస్థలో ఉత్తేజం నింపేందుకు చేపట్టిన చర్యల ప్రభావం తగ్గుముఖం పట్టడం, కరోనా కేసుల సంఖ్య పెరుగుతుండటం, విధానపరమైన సహకారం తగినంతగా లేకపోవడం, ఆర్థిక వ్యవస్థకు సాధారణంగా ఎదురయ్యే సవాళ్లు లాంటివి ఇందుకు దోహదం చేస్తాయ'ని ఆక్స్ఫర్డ్ ఎకనామిక్స్ తన నివేదికలో వెల్లడించింది. కరోనా కేసుల నియంత్రణ విషయంలో రాష్ట్ర ప్రభుత్వాలు ఆచరిస్తున్న విధానాలు కూడా ఇందుకు మరో కారణంగా తెలిపింది. లాక్డౌన్ ఎత్తివేసిన తర్వాత, ప్రారంభంలో కలిసొచ్చే సానుకూలతల ప్రభావం జూన్‌ వరకే ఉంటుంది. అంతర్జాతీయంగా ఆర్థిక వ్యవస్థలు కోలుకోవడం వల్ల ఎగుమతులు కొంతమేర పుంజుకుంటున్నాయి. తదుపరి పరిస్థితులు ఆందోళనకరంగా ఉండొచ్చు. కరోనా కేసుల సంఖ్య పెరుగుతుండటంతో ఆర్థిక వ్యవస్థ వృద్ధికి ఇప్పటికే అవరోధాలు ఎదురవుతున్నాయని ఆక్స్ఫర్డ్ ఎకనామిక్స్ అభిప్రాయపడింది. జూన్‌ తర్వాత నుంచి దేశవ్యాప్తంగా కొత్తగా కరోనా హాట్‌స్పాట్‌లు పెరిగాయని తెలిపింది. దిల్లీ మినహా మిగిలిన ఏ ప్రధాన ప్రాంతం కరోనా వైరస్‌ వ్యాప్తి నియంత్రణలో పెద్దగా విజయవంతం కాలేదని పేర్కొంది. మళ్లీ కరోనా నియంత్రణకు కఠిన ఆంక్షలు విధించేందుకు అవకాశాలున్నప్పటికీ.. మొదటి దశ లాక్డౌన్ స్థాయిలో ఉండకపోవచ్చని తెలిపింది. దేశ ఆర్థిక వ్యవస్థ పుంజుకోవడంలో ఇప్పటివరకు కీలక పాత్ర పోషించిన గ్రామీణ ఆర్థిక వ్యవస్థ.. మళ్లీ లాక్డౌన్ ఆంక్షలు విధించినా పెద్దగా ప్రభావానికి లోనుకాకపోవచ్చని తెలిపింది.
ఆర్థిక వ్యవస్థ కోలుకుంటోంది
దేశ ఆర్థిక వ్యవస్థ కోలుకుంటున్న సంకేతాలు కనిపిస్తున్నాయని భారత పరిశ్రమల సమాఖ్య (సీఐఐ) పేర్కొంది. 'ఈ ఏడాది ఏప్రిల్‌ నాటి పరిస్థితితో పోల్చితే ఇప్పుడు ఎంతో సానుకూలత కనిపిస్తోంది, అన్ని సూచీలు మెరుగ్గా ఉన్నాయి' అని విశ్లేషించింది. దీని ప్రకారం చూస్తే ఆర్థిక వ్యవస్థ ఆంగ్ల అక్షరం 'వీ' తరహాలో కోలుకోవచ్చని అభిప్రాయపడింది. 'జీఎస్‌టీ వసూళ్లు, రైల్వే సరకు రవాణా లెక్కలు, పెట్రోలు- డీజిల్‌- విద్యుత్తు వినియోగం, టోల్‌ వసూళ్లు, ఎలక్ట్రానిక్స్‌ వినియోగం బాగా పెరిగాయి, వీటన్నింటినీ చూస్తే... ఆర్థిక వ్యవస్థ కోలుకుంటోందనే అభిప్రాయానికి రావచ్చు' అని పేర్కొంది. దీన్ని కొనసాగించడానికి వీలుగా ఎక్కడైతే దిద్దుబాటు చర్యలు అసరమో... అక్కడ ప్రభుత్వం దృష్టి సారించాలని సీఐఐ డైరెక్టర్‌ జనరల్‌ చంద్రజిత్‌ బెనర్జీ అభిప్రాయపడ్డారు. అన్ని రకాల వ్యాపార కార్యకలాపాలు ప్రారంభం కావటానికి ప్రభుత్వం వీలుకల్పించాలని కోరారు. కరోనా మహమ్మారి ఎటువంటి మలుపు తీసుకుంటుందో అంచనా వేయలేమని, అయినప్పటికీ అటు వినియోగదార్లు, ఇటు పరిశ్రమల్లో భరోసా నింపటం కోసం ప్రభుత్వం చొరవ తీసుకోవాలని, తద్వారా డిమాండ్‌, పెట్టుబడులు పెరుగుతాయని విశ్లేషించారు. ఆర్థిక వ్యవస్థ కోలుకోవటానికి ఇప్పటి వరకు ప్రభుత్వం తీసుకున్న చర్యలు ఎంతగానో దోహదపడ్డాయని వివరించారు. ఎంఎస్‌ఎంఈ రంగానికి రూ.3 లక్షల కోట్ల 'కొలేటరల్‌' అవసరం లేని రుణాల ప్యాకేజీ, ఎన్‌బీఎఫ్‌సీ లకు రూ.30,000 కోట్ల 'ప్రత్యేక లిక్విడిటీ స్కీము' ప్రకటించటం ఎంతగానో మేలు చేసిందని అన్నారు. అదే సమయంలో వ్యవసాయ రంగం ఆర్థిక వ్యవస్థకు అండగా నిలిచిందని విశ్లేషించారు. వ్యవసాయ రంగంతో పాటు ఫార్మాసూటికల్స్‌, ఎఫ్‌ఎంసీజీ రంగాలు మెరుగ్గా ఉన్నాయని, కానీ విమానయానం, హోటళ్లు- పర్యాటకం, ఆటోమొబైల్‌ పరిశ్రమలను మాంద్యం వేధిస్తోందని పేర్కొన్నారు.
ఇదీ చూడండి: పసిడి కాస్త కనికరించింది- వెండి వెనక్కి తగ్గింది!
