2020 జనవరితో పోల్చితే ఈ ఏడాది జనవరిలో టెక్నాలజీ ఉద్యోగ నియామకాలు 13 శాతం పెరిగినట్లు ఇండీడ్.కామ్ సంస్థ వెల్లడించింది. 2020 ఏప్రిల్ నెల నుంచి నియామకాలు పెరుగుతున్నాయని, గత నవంబరులో అత్యధికంగా ఉద్యోగ నియామకాలు 17 శాతం పెరిగినట్లు పేర్కొంది. ఐటీ, ఐటీఈఎస్, ఆర్థిక సేవలు, ఇ-కామర్స్, కన్సల్టింగ్ రంగాల కంపెనీలు పెద్దఎత్తున ఉద్యోగ నియామకాలు చేపట్టినట్లు తేల్చింది.
సాఫ్ట్వేర్ ఆర్కిటెక్ట్, టెక్నికల్ లీడ్, క్లౌడ్ ఇంజినీర్, సీనియర్ సాఫ్ట్వేర్ ఇంజినీర్, ఫుల్ స్టేక్ డెవలపర్.. వంటి ఉద్యోగాలకు భారీగా జీతభత్యాలు లభిస్తున్నట్లు వివరించింది.
కరోనా మహమ్మారి వల్ల ఇంటి నుంచి పనిచేయాల్సిన పరిస్థితుల్లో టెక్నాలజీ ఆధారిత కార్యకలాపాలకు గిరాకీ ఏర్పడింది. దీనికి అనుగుణంగా టెక్నాలజీ నిపుణుల అవసరాలు పెరుగుతున్నాయి. అందుకే నియామకాలు అధికం అయ్యాయని ఇండీడ్.కామ్ ఎండీ శశికుమార్ వివరించారు. డిజిటైజేషన్, వర్చువల్ కార్యకలాపాలు ఇంకా పెరుగుతాయని, అందువల్ల సమీప భవిష్యత్తులో టెక్నాలజీ ఉద్యోగాలకు అధిక డిమాండ్ లభిస్తుందని అన్నారు.
ఇదీ చదవండి: డ్రైవర్ పక్క సీట్కు ఎయిర్ బ్యాగ్ తప్పనిసరి