మెండ్ ట్రీ- ఎల్ అండ్ టీ టేకోవర్ వివాదం ఐటీ రంగంలో ప్రకంపనలు సృష్టిస్తోంది. సంస్థ టేకోవర్కు ఎల్ అండ్ టీ చేస్తున్న ప్రయత్నాలను తీవ్రంగా వ్యతిరేకిస్తున్నట్టు మైండ్ ట్రీ ప్రకటన విడుదల చేసింది.
"మైండ్ ట్రీ సంస్థను టేకోవర్ చేసుకోవటానికి ఎల్ అండ్ టీ సంస్థ తీవ్రంగా ప్రయత్నిస్తోంది. సంస్థకి టేకోవర్ తీవ్ర నష్టాన్ని కలిగిస్తుంది. ఇదే కనుక జరిగితే 20 సంవత్సరాల పాటు పడిన కష్టం వృధా అవుతుంది. అందుకే ఎల్ అండ్ టీ చర్యను వ్యతిరేకిస్తున్నాం" అని మైండ్ ట్రీ ప్రమోటర్లు ప్రకటన విడుదల చేశారు.
ఒక వేళ మైండ్ ట్రీ సంస్థని ఎల్ అండ్ టీ టేకోవర్ చేయగలిగితే దేశంలో ఇప్పటివరకు జరిగిన ఐటీ ఒప్పందాల్లో ఇదే అతి పెద్దదిగా నిలుస్తుంది.
66 శాతం వాటా కొనుగోలుకు మైండ్ ట్రీ సంస్థకు ఎల్ అండ్ టీ 10,800 కోట్లు ఇస్తామని తెలిపింది. అయితే దీనిని మైండ్ ట్రీ సంస్థ తిరస్కరించింది.
మైండ్ ట్రీ లో 20.32 శాతం కలిగిన క్యఫే కాఫీ డే అధిపతి విజి సిదార్థతో ఒప్పందం కుదుర్చకుంది ఎల్ అండ్ టీ. బహిరంగ మార్కెట్ ద్వారా మరో 15 శాతం వాటాల కొనుగోలుకు ఆర్డర్ చేసింది. మరో 31 శాతాన్ని ఓపెన్ మార్కెట్ల ద్వారానే సమకూర్చుకోవాలని ఆలోచిస్తోంది ఎల్ అండ్ టీ.
ఎల్ అండ్ టీ స్పందన:
మైండ్ ట్రీ టేకోవర్ ఒప్పందంపై స్పందించింది ఎల్ అండ్ టీ. టేకోవర్ జరిగితే మైండ్ ట్రీ సంస్థని ఎల్ అండ్ టీ ఇన్ఫోటెక్లో విలీనం చేయబోమని ప్రకటించింది. అదేవిధంగా ఎల్ అండ్ టీ స్థిరమైన సంస్థ అని మైండ్ ట్రీ ఉద్యోగులు భవిష్యత్పై ఆందోళన చెందాల్సిన అవసరం లేదని తెలిపింది
