సామాజిక మాధ్యమాల్లో దేశీయ మొబైల్ యాప్లకు డిమాండ్ విపరీతంగా పెరుగుతోంది. సరిహద్దుల్లో చైనా-భారత్ మధ్య వివాదం తర్వాత 'బాయ్కాట్ చైనా' ఉద్యమం ఊపందుకోవడం దేశీయ సామాజిక మాధ్యమ, చాటింగ్ యాప్లకు కలిసొస్తోంది.
టిక్టాక్కు పోటీ..
చైనాకు చెందిన టిక్టాక్ యాప్కు దేశీయంగా ఎంత క్రేజ్ ఉందో ప్రత్యేకంగా చెప్పనక్కర్లేదు. ఈ యాప్కు పోటీగా రూపొందించిన 'చింగారీ' ఇప్పుడు మంచి ఆదరణ పొందుతోంది.
తమ యాప్ 25 లక్షల డౌన్లోడ్ల మైలురాయిని దాటినట్లు చింగారీ యాప్ నిర్వాహకులు ప్రకటించారు. గడిచిన 10 రోజుల్లో 5 లక్షల 50 వేల మంది ఈ యాప్ డౌన్లోడ్ చేసుకున్నట్లు వెల్లడించారు. అంతకు ముందు ఓ సారి చేసిన ప్రకటనలో కేవలం మూడు రోజుల్లో 5 లక్షల మంది తమ యాప్ డౌన్లోడ్ చేసుకున్నారని పేర్కొనడం గమనార్హం.
చింగారీ విశేషాలు..
టిక్టాక్లానే చింగారీ యాప్లోనూ తక్కువ నిడివిగల వీడియోలు అప్లోడ్ చేయొచ్చు. స్నేహితులతో చాటింగ్ చేసే సదుపాయం కూడా ఉంది.
ఈ యాప్లో వీడియోలు అప్లోడ్ చేయడం ద్వారా సామాజిక మధ్యమాల్లో ఆదరణ పొందడం సహా డబ్బులు సంపాదించొచ్చని యాప్ నిర్వాహకులు చెబుతున్నారు. యూజర్లు అప్లోడ్ చేసిన వీడియో ఎంత వైరల్గా మారింది, ఎంత మంది వీక్షించారు అనే అంశాల ఆధారంగా పాయింట్లు కేటాయిస్తామని.. వీటితో డబ్బులు సంపాదించే వీలుందని తెలిపారు.
గూగుల్ ప్లే స్టోర్, ఐఓఎస్లలో ఈ యాప్ డౌన్లోడ్ చేసుకోవచ్చు. దేశంలోని దాదాపు అన్ని ప్రధాన భాషల్లో ఈ యాప్ అందుబాటులో ఉంది.
ఇదీ చూడండి:ఫేస్బుక్కు మరో షాక్- స్టార్బక్స్ యాడ్స్ బంద్
