How to Make Soft Set Dosa at Home: మనలో చాలా మందికి దోశలు అంటే చాలా ఇష్టం ఉంటుంది. ఎక్కువగా మసాలా, ఆనియన్ దోశలు తింటుంటారు. కానీ, ప్రతిసారీ ఇలాంటి క్రిస్పీ దోశలు తిని బోర్ కొడుతుందా? అయితే, ఈసారి వెరైటీగా 'స్పాంజ్ సెట్ దోశ'ను ట్రై చేయండి. కొన్ని టిప్స్ పాటిస్తూ చేస్తే ఇంట్లోనే కమ్మటి, స్పాంజ్ దోశలను ప్రిపేర్ చేసుకోవచ్చు. ఈ దోశల్ని కొబ్బరి చట్నీ, పల్లీల చట్నీ, టమాటా చట్నీతో కలిపి తీసుకుంటే ఎంతో రుచిగా ఉంటాయి. ఈ నేపథ్యంలోనే ఈ సూపర్ హెల్దీ స్పాంజ్ దోశకు కావాల్సిన పదార్థాలేంటి? ఎలా తయారు చేసుకోవాలో ఇప్పుడు తెలుసుకుందాం.
కావాల్సిన పదార్ధాలు
- ఒక కప్పు బియ్యం
- పావు కప్పు మినపప్పు
- ఒక టీ స్పూన్ మెంతులు
- పావు కప్పు అటుకులు
- రుచికి సరిపడా ఉప్పు
- అర టీ స్పూన్ పసుపు
- నెయ్యి
తయారీ విధానం
- ముందుగా ఒక గిన్నెలో బియ్యం, మినపప్పు, మెంతులు వేసి మూడు సార్లు కడిగి, అవన్నీ మునిగేటట్లుగా నీళ్లు పోసి మూడు గంటల పాటు పక్కకు నానపెట్టుకోవాలి.
- ఆ తర్వాత అటుకులు తీసుకొని ఒకసారి కడిగి నీళ్లు పోసి అరగంట నానపెట్టుకోవాలి.
- ఇప్పుడు మూడు గంటల తర్వాత నానబెట్టిన బియ్యం, మినపప్పు, మెంతులు వడకట్టి మిక్సీలో వేసుకోవాలి. ఆ తర్వాత ఇందులోనే నానపెట్టిన అటుకులు నీళ్లతో మిక్సీలో వేసి దోస పిండిలా గ్రైండ్ చేసుకోవాలి.
- అనంతరం గ్రైండ్ చేసిన పిండిని వేరే గిన్నెలోకి తీసి కాస్త ఉప్పు వేసి మూత పెట్టి మరో 8 గంటలు పులియపెట్టాలి.
- ఆ తర్వాత ఒకసారి పిండిని బాగా కలిపి పసుపు, ఉప్పు వేసి మరోసారి బాగా కలపాలి.
- ఇప్పుడు స్టౌ ఆన్ చేసి దోస పెనం పెట్టుకుని వేడి చేసుకోవాలి.
- పెనం వేడైన తర్వాత కాస్త పిండి వేసి దోసని మరి పలచగా కాకుండా మందంగా వేసుకోవాలి.
- దోశ చుట్టూ వేసుకొని కాస్త నెయ్యి వేసుకుని కాసేపు మూత పెట్టి ఉంచాలి.
- ఆ తర్వాత మూత తీసి తెరగేసి ఇంకో పక్క కూడా కాల్చుకుంటే ఎంతో టేస్టీ, సాఫ్టీ స్పాంజ్ సెట్ దోశ రెడీ!
ఇలా చేస్తే 'తమిళనాడు సాంబార్' సూపర్ టేస్ట్! అన్నం, టిఫిన్స్ ఎందులోకైనా బెస్ట్ ఆప్షన్!!
షుగర్ను తగ్గించే 'మినుముల పులగం' ఎప్పుడైనా తిన్నారా? శరీరానికీ ఎంతో బలాన్ని ఇస్తుందట!
