స్టాక్ మార్కెట్లు వారాంతంలో స్వల్ప లాభాలే గడించినా.. రికార్డు స్థాయిల వద్ద ముగిశాయి. బీఎస్ఈ-సెన్సెక్స్ 70 పాయింట్లు బలపడి జీవనకాల గరిష్ఠమైన 46,961 వద్దకు చేరింది. ఎన్ఎస్ఈ- నిఫ్టీ 20 పాయింట్లు పెరిగి నూతన రికార్డు స్థాయి అయిన 13,760 వద్ద స్థిరపడింది.
విదేశీ పెట్టుబడుల ఊతంతో రికార్డు స్థాయి గరిష్ఠాల వద్ద శుక్రవారం సెషన్ను ప్రారంభించాయి సూచీలు. అయితే లాభాల స్వీకరణ కారణంగా కొద్ది సేపటికే ఒడుదొడుకుల్లోకి జారుకున్నాయి. బైబ్యాక్ ప్రారంభించిన కారణంగా టీసీఎస్ షేర్లు భారీగా పుంజుకున్నాయి. ఇతర ఐటీ షేర్లూ సానుకూలంగా స్పందించటం, చివరి గంటలో హెవీ వెయిట్ బ్యాంకింగ్ బ్యాంకింగ్ షేర్లు పుంజుకోవడం వల్ల స్వల్ప లాభాలను గడించాయి సూచీలు.
ఇంట్రాడే సాగిందిలా..
సెన్సెక్స్ 47,026 పాయింట్ల అత్యధిక స్థాయి (జీవన కాల గరిష్ఠం), 46,630 పాయింట్ల అత్యల్ప స్థాయిలను నమోదు చేసింది.
నిఫ్టీ 13,771 పాయింట్ల గరిష్ఠ స్థాయి (నూతన గరిష్ఠం).. 13,658 పాయింట్ల కనిష్ఠ స్థాయిల మధ్య కదలాడింది.
లాభనష్టాల్లోనివి ఇవే..
బజాజ్ ఆటో, ఇన్ఫోసిస్, ఎస్బీఐ, టైటాన్, ఐసీఐసీఐ బ్యాంక్, హెచ్సీఎల్టెక్ షేర్లు లాభాలను గడించాయి.
ఇండస్ఇండ్ బ్యాంక్, హెచ్డీఎఫ్సీ బ్యాంక్, ఓఎన్జీసీ, మారుతీ, బజాజ్ ఫినాన్స్, కోటక్ మహీంద్రా బ్యాంక్ నష్టాలను మూటగట్టుకున్నాయి.
ఇతర మార్కెట్లు
ఆసియాలో ఇతర ప్రధాన స్టాక్ మార్కెట్లు అయిన షాంఘై, టోక్యో, హాంకాంగ్ సూచీలు నష్టాలను మూటగట్టుకున్నాయి. సియోల్ సూచీ మాత్రం స్వల్పంగా లాభపడింది.
ఇదీ చూడండి:చిన్న మొత్తమైనా 'సిప్'తో ప్రయోజనాలెన్నో..
