'మిస్టర్ ఫర్ఫెక్ట్' సినిమాలో కాజల్కు ప్రభాస్ పుట్టిన రోజు శుభాకాంక్షలు చెప్పే సీన్ గుర్తుందా? ఆ సన్నివేశంలో ముందుగానే తన ల్యాప్టాప్లో ఓ వీడియో చిత్రీకరించి.. నిర్దేశిత సమయానికి విషెస్ వెళ్లేలా సెట్ చేస్తాడు. ఇప్పుడిదంతా ఎందుకంటారా! సరిగ్గా ఈ తరహా ఫీచర్ను త్వరలో మీ ముందుకు తీసుకురానుంది సామాజిక మాధ్యమ దిగ్గజం ట్విట్టర్.
ప్రస్తుతం ఈ ప్రత్యేకత.. డెస్క్టాప్లో 'ట్విట్టర్ ఫర్ డెస్క్' వాడే ఎంపిక చేసిన యూజర్లకు మాత్రమే ఈ షెడ్యూల్ ఫీచర్ అందుబాటులో ఉంది. త్వరలో ఆండ్రాయిడ్, ఐఓఎస్ యూజర్లకు ఈ ఫీచర్ను తీసుకురానున్నట్లు వెల్లడించింది.
దీని ద్వారా ముందుగానే ట్వీట్ సిద్ధం చేసుకొని.. నిర్దిష్ట సమయానికి సెండ్ అయ్యే వెసులుబాటు ఉంటుంది. ట్వీట్ వెళ్లే ముందు.. ఒకసారి సరిచేసేందుకూ అవకాశం కల్పించనుంది. అసభ్యకర పదాలు, వార్తలను గుర్తించేందుకు ఏఐ, ఎంఎల్ టూల్స్ను తయారు చేసినట్లు పేర్కొంది.
అయితే.. ఈ ఎడిట్ ఆప్షన్ ప్రస్తుతం ఐఓఎస్ వినియోగదారులకు మాత్రమే అందుబాటులో ఉంటుందని తెలిపింది. ఇది ప్రయోగాత్మకంగా చేపడుతున్నట్లు వెల్లడించింది. సోషల్ మీడియా మెనేజర్లు, మీడియా ప్రతినిధులకు ఈ తరహా సదుపాయం ఎంతగానో ఉపయోగపడుతోందని ట్విట్టర్ భావిస్తోంది.
ఇదీ చూడండి:' దేశంలో ఏడువేలకు పైగా కరోనా ప్రత్యేక ఆసుపత్రులు'
