ఆ నిబంధన కొత్తది కాదు- కేంద్రం వివరణ

ఓటీటీ, డిజిటల్​ మీడియా మాధ్యమాలకు కేంద్రం నూతన మార్గదర్శకాలను ఇప్పటికే విడుదల చేసింది. వాటిలో ఉండే డిజిటల్​​​ కంటెంట్​ను నిరోధించడంపై కేంద్ర సమాచార, ప్రసార మంత్రిత్వశాఖ వివరణ ఇచ్చింది. ఈ అధికరణ 2009 నుంచే ఉన్నట్లు పేర్కొంది.

అత్యవసర సమయాల్లో డిజిటల్ కంటెంట్​ను నిరోధించే అధికరణ.. కొత్త మార్గదర్శకాల్లో ప్రత్యేకంగా తీసుకురాలేదని కేంద్ర సమాచార, ప్రసార మంత్రిత్వశాఖ(ఐబీ) స్పష్టం చేసింది. ఈ నియమం 2009 నుంచే ఉందని పేర్కొంది. మార్గదర్శకాల్లో ఉన్న పార్ట్​ III రూల్ 16 కింద ఎమర్జెన్సీ సమయంలో కొంతకాలం పాటు ఇంటర్నెట్​ కంటెంట్​ను బ్లాక్​ చేసే అధికారం ఐబీ కార్యదర్శికి ఉంటుందని తెలిపింది.

"ఇంటర్​నెట్​ కంటెంట్​ను అత్యవసర సమయాల్లో బ్లాక్​ చేసే అధికారం కొత్త మార్గదర్శకాల ద్వారా వచ్చింది కాదు. ఇది 11 ఏళ్లుగా ఉంది. ఈ అధికరణ ప్రకారం సమాచార, ప్రసార మంత్రిత్వ శాఖ కార్యదర్శి ఎమర్జెన్సీ కాలంలో డిజిటల్​ కంటెంట్​ను నిరోధించవచ్చు. వాటికి సంబంధించిన నియమావళి 2009 లోనే విడుదల అయ్యింది. కొత్తగా తీసుకొచ్చింది కాదు. ఇందుకు సంబంధించినవి కొత్తగా జత చేయలేదు."

-సమాచార, ప్రసార మంత్రిత్వ శాఖ

ఓటీటీ, డిజిటల్​ మీడియా మాధ్యమాలకు కేంద్రం నూతన మార్గదర్శకాలను గురువారం జారీ చేసింది. అన్ని మీడియా ప్లాట్‌ఫామ్స్‌కి ఒకే తరహా న్యాయం వర్తింపజేయడానికి కొత్త నిబంధనలను అమల్లోకి తెస్తున్నట్లు కేంద్రం వెల్లడించింది.