ప్రపంచంలోనే భారత్ అతిపెద్ద టీకా కార్యక్రమాన్ని చేపట్టి.. కేవలం 12 రోజుల్లోనే 23 లక్షల మందికి వ్యాక్సిన్ వేసినట్లు ప్రధాని నరేంద్ర మోదీ తెలిపారు. కొన్ని నెలల్లోనే 30 కోట్ల మందికి టీకా ఇవ్వాలని లక్ష్యంగా పెట్టుకున్నట్లు వెల్లడించారు. దావోస్‌లో జరుగుతున్న ప్రపంచ ఆర్థిక వేదిక (డబ్ల్యూఈఎఫ్) సదస్సులో వర్చువల్గా పాల్గొన్న మోదీ ఈ వివరాలు తెలిపారు.
భారత్ ప్రస్తుతం రెండు టీకాలు తయారు చేసిందని.. త్వరలో మరిన్ని వ్యాక్సిన్లు అందుబాటులోకి రానున్నాయని చెప్పారు. కరోనా కారణంగా భారత్ ప్రపంచస్థాయి బాధ్యతను తీసుకుని.. 150 దేశాలకు అవసరమైన ఔషధాలు సరఫరా చేసిందని గుర్తు చేశారు.
'కరోనా వల్ల భారత్ అత్యధికంగా ప్రభావితమవుతుందని ప్రపంచమంతా భావించింది. 70-80 కోట్ల మందికి కరోనా సోకుతుందని, కనీసం 20 లక్షల మంది చనిపోతారని అంచనాలు వచ్చాయి. కానీ భారత్ నిరాశ చెందకుండా.. ఆ పరిస్థితులను ఎదుర్కొంది. ఇప్పుడు భారత్ అత్యంత సమర్ధంగా కరోనాను ఎదుర్కొంటోంది.' అని మోదీ వివరించారు.
ఇదీ చూడండి:ఆర్థిక సర్వేలో ఏముంటుందో తెలుసా?
