కరోనా వైరస్ ప్రపంచవ్యాప్తంగా తీవ్ర ఆందోళనలు కలిగిస్తోంది. ఈ నేపథ్యంలో అన్ని రకాల వ్యాపారాలకు తీవ్ర అంతరాయం ఏర్పడింది. కొవిడ్-19 నేపథ్యంలో సప్లయి, డిమాండ్ వ్యవస్థ దెబ్బతింది. కరోనా కారణంగా ఫిబ్రవరిలో 61.8 మిలియన్ల స్మార్ట్ఫోన్లు మాత్రమే విక్రయమైనట్లు స్ట్రాటజీ అనలైటిక్స్ సర్వేలో తేలింది. గత ఏడాది ఫిబ్రవరితో పోలిస్తే.. ఈసారి విక్రయించిన స్మార్ట్ఫోన్ల సంఖ్య 38 శాతం తక్కువని తెలిపింది.
"ప్రపంచ స్మార్ట్ఫోన్ మార్కెట్ మునుపెన్నడూ చూడనంత పతనాన్ని 2020 ఫిబ్రవరిలో నమోదు చేసింది. దీనిని గుర్తుచేసుకోకూడదని స్మార్ట్ఫోన్ పరిశ్రమ భావిస్తోంది. స్మార్ట్ఫోన్ సప్లయి, డిమాండ్కు ప్రపంచవ్యాప్తంగా తీవ్ర అంతరాయం ఏర్పడింది." -స్ట్రాటజీ అనలైటిక్స్
కరోనా భయాలతో ఆసియాలో చాలా మంది స్టోర్లకు వచ్చి స్మార్ట్ఫోన్లను కొనుగోలు చేయడమే తగ్గించేశారు. ఈ కారణంగా సంస్థలు కూడా తయారీని తగ్గించేశాయని సర్వే పేర్కొంది. వైరస్ బారి నుంచి చైనా కోలుకున్నట్లు తెలుస్తున్నా.. మార్చిలోనూ కొనుగోళ్లు తక్కువగానే ఉండొచ్చని తెలిపింది.
రానున్న రోజుల్లో విక్రయాలు పెంచుకునేందుకు స్మార్ట్ఫోన్ల తయారీ సంస్థలు డిస్కౌంట్లు, ఫ్లాష్ సేల్స్ వంటి వ్యూహాలతో ముందుకు వచ్చే అవకాశముందని సర్వే అభిప్రాయపడింది.
