ఫోన్ లేకున్నా వాట్సాప్ వెబ్ వాడొచ్చా? ఎలా సాధ్యం అనుకుంటున్నారా? త్వరలోనే దాన్ని సాకారం చేయడానికి వాట్సాప్ సన్నాహాలు చేస్తోంది.
వినియోగదారులకు మరింత సౌలభ్యం చేకూర్చడానికి వాట్సాప్ వెబ్ను 2015లో పరిచయం చేసింది మాతృసంస్థ ఫేస్బుక్. అయితే ఫోన్ దగ్గర లేకుండా ల్యాప్టాప్, పీసీల్లో వాట్సాప్ వెబ్ను వాడలేని పరిస్థితి.
టెలిగ్రాం ముందంజ..
వాట్సాప్ పోటీ సంస్థ టెలిగ్రాం ఇప్పటికే 'యూడబ్ల్యూపీ ఫీచర్' ద్వారా తన వినియోగదారులకు ఫోన్ లేకుండానే టెలిగ్రాం వెబ్ వాడుకునే సౌలభ్యం కల్పించింది.
కొత్త ముచ్చట...
'వాట్సాప్ తన వినియోగదారులకూ ఈ సౌలభ్యం కల్పించడానికి నడుంబిగించింది. మైక్రోసాఫ్ట్ అభివృద్ధి చేసిన యూనివర్సల్ విండోస్ ప్లాట్ఫాం ద్వారా వాట్సాప్ వెబ్ను త్వరలోనే అందుబాటులోకి తీసుకురావడానికి సన్నాహాలు చేస్తోంది' అని డబ్ల్యూఏ బీటెల్ ఇన్ఫో వెబ్సైట్ పేర్కొంది.
యూడబ్ల్యూపీ యాప్, అలాగే వాట్సాప్ అభివృద్ధి చేస్తున్న మల్టీ ప్లాట్ఫాం సిస్టమ్ ద్వారా వినియోగదారులు ఫోన్ లేకుండానే డెస్క్టాప్లో వాట్సాప్ వాడడానికి వీలవుతుంది. ఫోన్ స్విచ్ ఆఫ్ అయినప్పుడు, ఫోన్ దగ్గర లేనప్పుడు ఈ ఫీచర్ ఎంతో సౌకర్యంగా ఉంటుంది. అయితే ఈ వార్తకు కచ్చితమైన ఆధారాలు లేవని చెప్పింది ఈ టెక్ వెబ్సైట్.
మరిన్ని ఫీచర్లు
వాట్సాప్.... మరిన్ని నూతన ఫీచర్లను అందుబాటులోకి తేనుంది. ఇటీవలే పిక్చర్ ఇన్ పిక్చర్ ఫీచర్ తీసుకొచ్చింది. యూట్యూబ్, ఇన్స్టాగ్రామ్ వీడియోలు వాట్సాప్లోనే చూసుకునే వెసులుబాటునూ కల్పించింది. త్వరలోనే డార్క్ మోడ్ను, ప్రైవసీ కంట్రోల్ను ప్రవేశపెట్టబోతోంది.
ఇదీ చూడండి: వాణిజ్య చర్చల సఫలంపై ఆశలతో లాభాలు
