గత ఏడాది జూన్తో పోలిస్తే.. 2020 ఆరో నెల తొలి అర్థభాగంలో షాపింగ్ మాల్స్ 77 శాతం ప్రతికూల వృద్ధిని నమోదు చేశాయి. వీధి వ్యాపారాల వృద్ధి 61 శాతం పడిపోయింది. కరోనా నేపథ్యంలో విధించిన లాక్డౌన్ నుంచి ఇటీవల సడలింపులు ఇచ్చినా.. వినియోగదారుల్లో ఇంకా భయాలు ఉండటమే ఇందుకు ప్రధాన కారణమని ఓ నివేదిక వెల్లడించింది.
భారత రిటైలర్ల సంఘం (ఆర్ఏఐ) ఈ సర్వే చేసింది. ప్రతికూల వృద్ధి నేపథ్యంలో.. లాక్డౌన్ సడలింపులు ఇచ్చినా రిటైల్ వ్యాపారాలకు పెద్దగా ఉపయోగపడలేదని నివేదిక అభిప్రాయపడింది. ముఖ్యంగా వినియోగదారుల్లో షాపింగ్పై లాక్డౌన్కు ముందు ఉన్న సెంటిమెంట్ ఇప్పుడు లేదని తెలిపింది. రానున్న రోజుల్లో ఈ సెంటిమెంట్ మెరుగయ్యే అవకాశం ఉందని ఆశాభావం వ్యక్తం చేసింది.
సర్వేలోని ముఖ్యాంశాలు..
- ఆదాయం లేకపోవడం సహా ఇతర కారణాలతో ప్రతి ఐదుగురిలో నలుగురు వినియోగదారులు షాపింగ్ ఖర్చులను తగ్గించుకుంటున్నారు.
- కేటగిరీల వారీగా చూస్తే.. రెస్టారెంట్లు (70 శాతం), దుస్తుల దుకాణాలు (69 శాతం), యాక్సెసిరీస్ (65 శాతం ) క్షీణతను నమోదు చేశాయి.
- దేశవ్యాప్తంగా అన్ని ప్రాంతాల్లో ఇంకా వ్యాపార కార్యకలాపాలు ప్రారంభం కాలేదు. దీనివల్ల వ్యాపారాలు దెబ్బతిని .. ఆ ప్రభావం ఆర్థిక వ్యవస్థపై పడొచ్చు.
- అన్ని రకాల వ్యాపారాలు వీలైనంత త్వరగా తెరుచుకోవాలి.. అప్పడే దేశం రికవరీ దిశగా ప్రయాణం ప్రారంభిస్తుంది.
ఇదీ చూడండి:గడువు ముగుస్తోంది.. ఈ పనులు పూర్తి చేశారా?
