'ఎమ్ఐ టీవీ' వినియోగదారుల కోసం 'జియో సినిమా' యాప్ త్వరలో అందుబాటులోకి రానుంది. రిలయన్స్ జియోకు చెందిన పాపులర్ వీడియో ఆన్ డిమాండ్ కంటెంట్ ప్రస్తుతం ఎమ్ఐ టీవీ వినియోగదారులకు అందుబాటులోకి వచ్చింది.
చైనాకు చెందిన తయారీదారు షియోమీ తన టీవీ సిరీస్ల్లో... ఓటీటీ, జియో సినిమా అప్లికేషన్లను తీసుకొస్తున్నట్లు ట్విట్టర్ వేదికగా ప్రకటించింది. షియోమీ విడుదల చేసిన ఓ టీజర్లో... ఇకపై ప్రేక్షకులు పెద్ద స్క్రీన్ల్లో జియో సినిమా వీక్షించగలుగుతారని స్పష్టం చేసింది.
ఎమ్ఐ టీవీలో జియో సినిమా
షియోమీ కేవలం స్మార్ట్ఫోన్లను మాత్రమే కాకుండా ఎమ్ఐ టీవీలనూ కూడా భారత మార్కెట్లో ప్రవేశపెట్టింది. సరసమైన ధరల శ్రేణిలో వచ్చి, మంచి సేవలు అందించిన షియోమీ ఉత్పత్తులు భారత్లో విశేష ఆదరణ పొందాయి. ఆండ్రాయిడ్ సపోర్టుతో, ప్యాచ్వాల్ యూఐతో వచ్చిన ఎమ్ఐ టీవీలు విజయవంతమయ్యాయి.
ప్రస్తుతం వినియోగదారులు వీటిలో ఎక్కువగా ఆన్-డిమాండ్ కంటెంట్ను ఇష్టపడుతున్నారు. విరివిగా వినియోగిస్తున్నారు.
రిలయన్స్ జియో...
రిలయన్స్ జియో... ఓటీటీ కంటెంట్ను, టీవీ షోలు, సినిమాలను.. 'జియో సినిమా' పేరుతో వినియోగదారుల ముందుకు తీసుకొచ్చింది. ఆన్-డిమాండ్ కంటెంట్ కోరే చందాదారులు ఈ యాప్ను వినియోగించుకోవచ్చు. 'లైవ్ టీవీ' కోసం 'జియో టీవీ యాప్'ను తీసుకొచ్చింది.
ఎమ్ఐ టీవీ... పెద్ద స్క్రీన్లో
ఇప్పుడు రిలయన్స్ జియో చందాదారులు... ఇకపై ఎమ్ఐ టీవీ పెద్ద స్క్రీన్ల్లో తమకు నచ్చిన ఆన్-డిమాండ్ వీడియో కంటెంట్ను చూడవచ్చు. వారి మొబైల్ ఫోన్ నుంచి టీవీ స్క్రీన్లకు అనుసంధానం చేయాల్సిన పనిలేదు.
జియోలో డిస్నీ కంటెంట్
ఇటీవల రిలయన్స్ జియో, డిస్నీతో భాగస్వామి అయింది. జియో సినిమా ద్వారా రిలయన్స్ చందాదారులకు టోయ్ స్టోరీ 3, ది జంగిల్బుక్, ది లయన్కింగ్ లాంటి డిస్నీ సినిమాలను, వీడియో కంటెంట్ను అందిస్తోంది.
ఎమ్ఐ టీవీ లేకపోతేనేమి...
ఒకవేళ మీ దగ్గర ఎమ్ఐ టీవీ లేకున్నా, మీకున్న టీవీలో ఇన్బిల్ట్గా జియోసినిమా యాప్ లేకున్నా, మరేం ఫర్వాలేదు. వీరి కోసమే రిలయన్స్ జియో... క్రోమ్కాస్ట్ సౌకర్యం కల్పిస్తోంది. దీనితో మీరు మీ టీవీలోనే జియో సినిమా వీడియోలను వీక్షించగలుగుతారు.
జియో సినిమా హిందీ, ఇంగ్లీష్, మరాఠీ, తమిళం, కన్నడ, తెలుగు, మలయాళం, బెంగాలీ, గుజరాతీ, పంజాబీ, భోజ్పురి భాషల్లో వీడియో కంటెంట్ను అందిస్తోంది. అలాగే మై డౌన్లోడ్స్, ఆటో ప్లే టీవీ సేవలు, వాచ్లిస్ట్తో పాటు మరిన్ని ఫీచర్లనూ అందిస్తోంది.
ఇదీ చూడండి: సంఝౌతా ఎక్స్ప్రెస్ శాశ్వతంగా రద్దు
