బీమా సంస్థల నుంచి ఇన్స్యూరెన్స్ సొమ్ము పొందటానికి హక్కుదారులు తీవ్ర ఇబ్బందులు ఎదుర్కొంటున్నారని దిల్లీ వినియోగదారుల కమిషన్ వ్యాఖ్యానించింది. నిరక్షరాస్యులు బీమా దరఖాస్తు ఫారంపై సంతకం చేసేటప్పుడు అందులోని నిబంధనలను ఎలా చదువుతారని వినియోగదారుల కమిషన్ ప్రశ్నించింది. చాలా సందర్భాల్లో బీమా పొందేందుకు నిబంధనలు అడ్డుపడుతున్నాయని పేర్కొంది.
ఉహించని పరిస్థితుల్లో వైద్యం పొందడం కోసమే ఆరోగ్య బీమాను తీసుకుంటారు. బీమా పొందే సమయంలో ఎలాంటి అవకతవకలకు పాల్పడకపోతే, ఆ వినియోగదారునికి కచ్చితంగా బీమా సొమ్ము చెల్లించాలి. - దిల్లీ వినియోగదారుల కమిషన్.
దిల్లీ ఫరీదాబాద్కు చెందిన ప్రతాప్ సింగ్ ఓ ప్రయివేటు బీమా సంస్థలో 2008వ సంవత్సరంలో 50 లక్షల రూపాయల పాలసీని తీసుకున్నాడు. ఈ బీమా కాలపరిమితి 20 సంవత్సరాలు . దీనికి ఆయన సోదరుడు విర్పాల్ నగర్ను నామినీగా పెట్టాడు.
2009లో ప్రతాప్సింగ్ మరణంతో అతని సోదరుడు విర్పాల్ బీమా సొమ్ము కోసం దరఖాస్తు చేసుకున్నాడు. 2010లో బీమా సంస్థ ఆయన వినతిని తిరస్కరించింది.
ప్రతాప్ సింగ్కు అంతకు ముందే ఆస్తమా, పక్షవాతం ఉన్నాయని... వీటిని దరఖాస్తులో ప్రస్తావించనందుకే తిరస్కరించామని సంస్థ తెలిపింది. దీంతో విర్పాల్ నగార్ వినియోగదారుల కమిషన్ను ఆశ్రయించాడు.
బీమా తిరస్కరణకు సంస్థ తెలిపిన కారణాలు సరిగా లేవని వినియోగ దారుల కమిషన్ సభ్యుడు అనిల్ శ్రీవాస్తవ తెలిపారు. రెండు నెలలలోపు తిరిగి బీమా సొమ్ము పొందేందుకు దరఖాస్తు చేసుకునేలా విర్పాల్కు అవకాశం కల్పించాలని సంస్థను ఆదేశించింది.
ఇంతకుముందెప్పుడూ చికిత్స తీసుకోకుండా, శస్త్ర చికిత్స తీసుకోకపోతే అది ముందు నుంచి ఉన్న వ్యాధుల కిందకి రాదని గతంలో ఇచ్చిన ఆదేశాలను కమిషన్ గుర్తు చేసింది.
ఏదైనా అనారోగ్యం ఉన్నప్పటికీ చికిత్స తీసుకోకపోయినా, ఆసుపత్రిలో చేరకపోయినా అది ముందు నుంచే ఉన్న రోగంగా పరిగణించకూడదని గతంలో ఇచ్చిన ఆదేశాలను కమిషన్ గుర్తుచేసింది.
