కరోనా సంక్షోభం, లాక్డౌన్ల కారణంగా 2020-21 ఆర్థిక సంవత్సరంలో భారత వృద్ధి రేటు 5 శాతం మేర క్షీణిస్తుందని అంతర్జాతీయ రేటింగ్ సంస్థ ఎస్ అండ్ పీ అంచనా వేసింది. ప్రస్తుత సంక్షోభ ప్రభావం వచ్చే ఏడాది వరకు కొనసాగుతుందని అభిప్రాయపడింది.
వృద్ధి క్షీణత తప్పదు..
లాక్డౌన్ కారణంగా భారత ఆర్థిక వ్యవస్థ హఠాత్తుగా స్తంభించిందని... అందువల్ల దేశ వృద్ధిరేటు క్రమంగా క్షీణిస్తోందని ఆర్బీఐ సహా పలు ప్రముఖ రేటింగ్ సంస్థలు అంచనా వేశాయి. ఫిచ్, క్రిసిల్ కూడా ప్రస్తుత ఆర్థిక సంవత్సరంలో భారత వృద్ధిరేటు 5 శాతం వరకు తగ్గుతుందని అంచనా వేశాయి. తాజాగా ఎస్ అండ్ పీ కూడా ఈ జాబితాలో చేరింది.
"ఈ ఏప్రిల్లో... 2020-21 ఆర్థిక సంవత్సరంలో భారత వృద్ధిరేటు 1.8 శాతం ఉంటుందని అంచనా వేశాం. రెండు నెలల లాక్డౌన్ నేపథ్యంలో.. ఈ వృద్ధిరేటు 5 శాతం మేర క్షీణిస్తుందని మా అంచనాలను సవరించాం. అలాగే 2021-22 ఏడాది వృద్ధి 8.5 శాతానికి ( మునుపటి అంచనా 7.5 శాతం) చేరుకుంటుందని భావిస్తున్నాం. అయితే 2023లో జీడీపీ 6.5 శాతం, 2024లో జీడీపీ 6.6 శాతం పెరుగుతుంది."
- ఎస్ అండ్ పీ
అక్కరకు రాని ప్యాకేజీ..
కేంద్ర ప్రభుత్వం ఘనంగా రూ.20 లక్షల కోట్ల కరోనా ప్యాకేజీ ఇచ్చామని ప్రకటించినా... వాస్తవంలో అది చాలా తక్కువగా కేటాయింపులు చేసిందని ఎస్ అండ్ పీ తేల్చిచెప్పింది. ఇతర దేశాలు కల్పించిన ఉద్దీపనలతో పోల్చితే ఇది ఏమాత్రం సరిపోయేది కాదని స్పష్టం చేసింది.
వాస్తవ నిరుద్యోగం...
ఫిచ్ సొల్యూషన్స్... భారత్లో వాస్తవ నిరుద్యోగం విపరీతంగా పెరిపోతోందని, ఫలితంగా వినియోగదారుల వ్యయం భారీగా క్షీణిస్తోందని వెల్లడించింది. ఆర్థిక అనిశ్చితుల వల్ల ప్రైవేట్ రంగాల్లో పెట్టుబడులు తగ్గుతాయని పేర్కొంది. 2020-21 ఆర్థిక సంవత్సరంలో దేశ వాస్తవ జీడీపీ 4.5 శాతం క్షీణిస్తుందని అంచనా వేసింది.
మూడీస్ ఇన్వెస్టర్స్ సర్వీస్... 2021 ఆర్థిక సంవత్సరంలో భారత వృద్ధిరేటు 'శూన్యం'గా ఉంటుందని అంచనా వేసింది. స్వతంత్ర భారతదేశం 1958, 1966, 1980 సంవత్సరాల్లో మాంద్యాన్ని చవిచూసింది. ముఖ్యంగా వ్యవసాయరంగం ఎదుర్కొన్న సంక్షోభమే అందుకు కారణం.
కానీ ఇప్పుడు భారత్ ఎదుర్కొంటున్న సంక్షోభం చాలా భిన్నమైనది. మూడు విడతలుగా లాక్డౌన్ పొడిగించడం వల్ల పారిశ్రామిక, ఆర్థిక కార్యకలాపాలు స్తంభించాయి. అయితే క్రమంగా లాక్డౌన్ సడలింపులు ఇస్తున్న కారణంగా ఆర్థిక కార్యకలాపాలు నెమ్మదిగా ప్రారంభమవుతున్నాయి.
ఇదీ చూడండి: దిగ్గజ సంస్థలో 12 వేల మంది ఉద్యోగులకు ఉద్వాసన
