ఒకప్పుడు హోటల్, రెస్టారెంట్, సూపర్ మార్కెట్లకు వెళ్తే.. క్యాష్ లేదా కార్డ్ తీసుకెళ్లడం తప్పనిసరి. కానీ ఇప్పుడు స్మార్ట్ఫోన్ ఉంటే చాలు. ఎందుకంటే డిజిటల్ పేమెంట్ యాప్లు (గూగుల్ పే, ఫోన్ పే, పేటీఎం వంటివి) ఆ అవసరాన్ని తీరుస్తున్నాయి.
ఈ యాప్లతో ఎవరికైనా కేవలం ఫోన్ నంబర్ సహాయంతో డబ్బులు పంపవచ్చు. చిన్న మొత్తాల నుంచి రూ.లక్ష వరకు ట్రాన్స్ఫర్ చేసుకోవచ్చు. ఇన్ని సదుపాయాలు అందిస్తున్నా.. వినియోగదారుల నుంచి ఈ యాప్లు ఛార్జీలు వసూలు చేయవు.
పెరిగిన రెవెన్యూలు..
2018-19లో గూగుల్ పే ఇండియా ఆదాయం రూ.1,119 కోట్లుగా ఉంది. 2019-20లో అది రూ.1501.7 కోట్లకు పెరిగింది. 2019-20 ఆర్థిక సంవత్సరంలో ఇది రూ.33 కోట్ల లాభాన్ని గడించింది.
ఫోన్ పే 2018-19 సంవత్సరంలో రూ.245 కోట్ల ఆదాయం నమోదు చేసింది. అది 2019-20 ఆర్థిక సంవత్సరంలో రూ. 427 కోట్లకు పెరిగింది. అయితే ఫోన్ పే నష్టాల్లోనే ఉంది.
యూజర్ల నుంచి ఛార్జీలు వసూలు చేయనప్పుడు ఈ యాప్లు ఇంత మొత్తం ఆదాయాలు ఎలా గడించాయనేగా మీ సందేహం. అదేలానో ఇప్పుడు చూద్దాం.
ఆదాయ మార్గాలు ఇవే..
నిజానికి ఈ యాప్లకు యూపీఐ పేమెంట్స్ వల్ల ఎలాంటి ఆదాయం రాదు. ఇవి పేమెంట్స్ మాత్రమే కాకుండా చాలా రకాల సర్వీసులను అందిస్తుంటాయి. మొబైల్ రీఛార్జ్, కరెంట్ బిల్, గ్యాస్ బిల్, క్రెడిట్ కార్డ్ బిల్ లాంటివి.
మొబైల్ రీఛార్జ్ తీసుకున్నట్లయితే టెలికాం కంపెనీలు ప్రతి లావాదేవీపై ఈ యాప్లకు కమీషన్ ఇస్తుంటాయి. ఇదే విధంగా ఆయా యాప్లు అందించే ఇతర సేవలకూ కమీషన్ రూపంలో ఆదాయం వస్తుంది.
వస్తు, సేవల ప్రమోషన్, వివిధ రకాల యాప్ల ప్రచారం కూడా ఈ డిజిటల్ పేమెంట్ యాప్లు నిర్వహిస్తుంటాయి. ఉదాహరణకు ఫోన్పేలో.. గ్రాసరీస్, ఇన్సూరెన్స్, ఫుడ్ తదితర సేవలను అందిస్తుంది. వీటి ద్వారా కూడా ఆదాయం వస్తుంది.
డేటా..
డేటాను కొత్త తరహా ఇంధనంగా అభివర్ణిస్తుంటారు. ఈ డిజిటల్ పేమెంట్ యాప్లలో వినియోగదారులు చేసే లావాదేవీల డేటా స్టోర్ అవుతుంది. దీని ద్వారా వినియోగదారుడి షాపింగ్ అలవాట్లు, అవసరాలు తెలుస్తాయి. ఈ డేటాను వివిధ కంపెనీలకు, ప్రకటన సంస్థలు కొనుగోలు చేసాయి. ఫలితంగా పేమెంట్ యాప్లకు ఆదాయం లభిస్తుంది. ఆ డేటాను కొనుగోలు చేసిన కంపెనీలు.. వినియోగదారుడి అలవాట్లకు తగ్గట్లు ఆకర్షణీయమైన ప్రకటనలు ఇచ్చేందుకు ఉపయోగించుకుంటాయి.
ఇవీ చదవండి:
