Mehul Choksi: ఛోక్సీని రప్పించేందుకు రంగం సిద్ధం!

ప్రముఖ వజ్రాల వ్యాపారి మెహుల్​ ఛోక్సీని(Mehul Choksi) భారత్​కు రప్పించేందుకు రంగం సిద్ధమైంది. ఇందుకుగానూ మన దేశం నుంచి ప్రత్యేక విమానం ఆంటిగ్వాకు చేరుకున్నట్లు అక్కడి ప్రధాని గాస్టన్ బ్రౌన్ వెల్లడించారు.

పంజాబ్‌ నేషనల్‌ బ్యాంకు కుంభకోణం(PNB SCAM) కేసులో డొమినికాలో అరెస్టైన వజ్రాల వ్యాపారి మెహుల్‌ ఛోక్సీని(Mehul Choksi) భారత్​కు రప్పించేందుకు రంగం సిద్ధమైంది. ఇందుకు సంబంధించి డొమినికాలోని డగ్లస్-చార్లెస్‌ విమానాశ్రయంలో భారత్​కు చెందిన ఓ ప్రైవేటు జెట్ వేచి చూస్తోందని ఆంటిగ్వా ప్రధాని గాస్టన్ బ్రౌన్ వెల్లడించారు. డొమినికాకు ప్రైవేటు జెట్‌ రాకపై స్థానిక మీడియాలో ఇప్పటికే అనేక కథనాలు వెలుబడ్డాయి.

మెహుల్‌ చోక్సీని(Mehul Choksi) భారత్​కు అప్పగించాలని డొమినికా పోలీసులను భారత్ కోరింది. ఇప్పటికే అతనిపై ఇంటర్​పోల్​ నోటీసులు ఉన్న విషయాన్ని గుర్తు చేసింది. పీఎన్​బీ కుంభకోణంలో(PNB SCAM) మెహుల్‌ చోక్సీది ప్రధాన పాత్ర అని పేర్కొంది. ఛోక్సీ భారతదేశ పౌరుడని ముందు నుంచే కేంద్రం వాదిస్తూ వస్తోంది. భారత్​లో సుమారు రెండు బిలియన్​ డాలర్ల మేర అక్రమాలకు పాల్పడినట్లు చెప్పింది. వీటి నుంచి తప్పించుకోవడానికే అతను ఆంటిగ్వా పౌరసత్వం తీసుకున్నట్లు పేర్కొంది.

2 రోజుల్లో ఆంటిగ్వాకు..

ఇరుదేశాల మధ్య ఉండే దౌత్య సంబంధాల దృష్ట్యా భారత్​కు అప్పగించాలని కోరింది. ఇదే విషయంపై ఆంటిగ్వా ప్రధాని సానుకూలంగా స్పందించారు. ఛోక్సీని సరాసరి భారత్​కు పంపించాలని డొమినికాకు సూచించారు. మరో రెండు రోజుల్లో డొమినికా నుంచి ఆంటిగ్వాకు అతన్ని పంపిస్తామని అక్కడి అధికారులు ఓ ప్రకటన విడుదల చేశారు.

భారత్‌కు ఛోక్సీ అప్పగింతపై డొమినికా న్యాయస్థానం స్టే విధించింది. తదుపరి విచారణ జూన్ ​2న జరగనుంది.

ఇదీ చూడండి: Mehul Choksi: జైలులో గాయాలతో ఛోక్సీ- ఫొటోలు వైరల్​!