చైనాలో విజృంభించిన కరోనా వైరస్ ప్రపంచంలో అతిపెద్ద వాణిజ్య కేంద్రాల్లో ఒకటైన హాంకాంగ్‌కూ వ్యాపించింది. ఈ వైరస్ కారణంగా అక్కడ నెలరోజుల అత్యయిక స్థితి విధించారు. పాఠశాలలు, కళాశాలల మూసివేతతో పాటు హాంకాంగ్లో వ్యాపారాలు నెమ్మదించాయి. ఈ ప్రభావం మన దేశంలోని సూరత్ వజ్రాల పరిశ్రమపై పడింది.
సూరత్‌కు హాంకాంగ్ ప్రధాన వ్యాపార కేంద్రం. ఏటా సూరత్ నుంచి దాదాపు 45 వేల కోట్ల విలువైన పాలిష్డ్ వజ్రాలు హాంకాంగ్‌కు ఎగుమతి అవుతుంటాయి. సూరత్ నుంచి ఎగుమతయ్యే మొత్తం వజ్రాల విలువలో ఇది 37 శాతానికి సమానం. చైనాకు మరో 4 శాతం ఎగుమతి అవుతాయి. ఇలా 41 శాతం వజ్రాల ఎగుమతులపై కరోనా ప్రభావం పడింది.
భారీ నష్టం..!
హాంకాంగ్లో ఎమర్జెన్సీ కారణంగా సూరత్ వజ్రాల వ్యాపారులు తిరుగుముఖం పట్టారు. పరిస్థితి ఇలాగే కొనసాగితే సూరత్ పరిశ్రమపై తీవ్ర ప్రభావం చూపిస్తుందని 'జెమ్స్‌ అండ్‌ జువెల్లరీ ఎక్స్‌పోర్ట్‌ ప్రమోషన్‌ కౌన్సిల్‌' (జేజేఈపీసీ) తెలిపింది. ఫిబ్రవరి, మార్చి నెలల్లో దాదాపు 8 వేలకోట్ల మేర నష్టం వాటిల్లే ప్రమాదం ఉందని పేర్కొంది.
"మార్చి నెలలో హాంకాంగ్లో అంతర్జాతీయ ఆభరణాల ప్రదర్శన జరగాల్సి ఉంది. ఈ ప్రదర్శన ద్వారానే ప్రపంచంలో ఆభరణాల ట్రెండ్ను పరిశీలిస్తారు. దాని ప్రకారమే తయారీదారులు ఏడాదంతా ప్రణాళికలు వేసుకుంటారు. కరోనా వైరస్ కారణంగా ఆ ప్రదర్శనను రద్దు చేసే అవకాశాలు కన్పిస్తున్నాయి. ఇది సూరత్ వ్యాపారులపై ప్రతికూల ప్రభావం చూపిస్తుంది."
- దినేశ్ నవాడియా, జేజేఈపీసీ ఛైర్మన్
సూరత్లో చేసిన పాలిష్డ్ వజ్రాలు, జువెల్లరీ.. హాంకాంగ్ ద్వారానే ప్రపంచమంతటికీ వెళ్తాయి. అత్యయిక స్థితి వల్ల హాంకాంగ్లో వ్యాపారాలను మూసేయాల్సిన పరిస్థితి వచ్చిందని వజ్రాల వ్యాపారులు చెబుతున్నారు.
ఇదీ చూడండి: ప్రపంచంపై విషం చిమ్ముతున్న 'కరోనా' కాలనాగు!
