మొబైల్ ఫోన్లపై జీఎస్టీ రేటును 18 శాతానికి పెంచుతూ జీఎస్టీ మండలి నిర్ణయం తీసుకోవడంపై పరిశ్రమ వర్గాలు అసంతృప్తి వ్యక్తం చేస్తున్నాయి. పన్ను రేటు పెంచడం కారణంగా దేశీయంగా మొబైల్ ఫోన్ల ధరలు పెరుగుతాయని, మేక్ ఇన్ ఇండియాపైనా ప్రతికూల ప్రభావం చూపుతుందని అంటున్నాయి.
పన్ను రేటు 12 నుంచి 18 శాతం పెంపు డిజిటల్ ఇండియాకు హానికర నిర్ణయంగా అభిప్రాయపడ్డారు ఇండియన్ సెల్యులార్ అండ్ ఎలక్ట్రానిక్స్ అసోసియేషన్ ఛైర్మన్ పంకజ్ మహీంద్రూ.
ఆ లక్ష్యాన్ని చేరుకోలేం
మండలి తీసుకున్న ఈ నిర్ణయంతో దేశీయంగా వినియోగం తగ్గిపోతుంది. తద్వారా దేశీయ వినియోగంతో 2025 నాటికి 80 బిలియన్ డాలర్లు (6 లక్షల కోట్లు) సాధించాలన్న మా లక్ష్యమూ నెరవేరదు. కనీసం రూ.2 లక్షల కోట్ల వరకు ఆదాయం తగ్గుతుందని అన్నారు.
నేషనల్ పాలసీ ఆన్ ఎలక్ట్రానిక్స్ 2019 కింద ప్రభుత్వం తమకు రూ.26 లక్షల కోట్ల ఎలక్ట్రానిక్ తయారీ వ్యవస్థను 2025 కల్లా రూపొందించాలని లక్ష్యంగా పెట్టిన విషయాన్ని ఆయన గుర్తు చేశారు. ఇందులో 1 బిలియన్ మొబైళ్లు తయారీతో .. రూ.13 లక్షల కోట్ల (రూ.5 లక్షల కోట్లు దేశీయంగా, రూ.7 లక్షల కోట్ల ఎగుమతులు) విలువైన వ్యవస్థను తయారు చేయాలని సూచించినట్లు ఆయన పేర్కొన్నారు.
ఇది సరైన సమయం కాదు..
కరోనా కారణంగా తీవ్ర ఎలక్ట్రానిక్ సంక్షోభం ఉన్న సమయంలో ధరల పెంపు వల్ల ఒక సెక్షన్ యూజర్లు సెకండ్ హ్యాండ్ గానీ బ్లాక్ మార్కెట్వైపు గానీ మొగ్గు చూపుతారని కౌంటర్పాయింట్ రీసర్చ్ అసోసియేషన్ డైరెక్టర్ తరణ్ పతక్ అన్నారు.
కనీసం వాటిపైనైనా..
చైనాకు చెందిన ప్రముఖ స్మార్ట్ఫోన్ తయారీ సంస్థ షియోమీ కూడా మొబైల్ ఫోన్లను 18 శాతం జీఎస్టీ శ్లాబుల్లోకి చేర్చడంపై ఆందోళన వ్యక్తం చేసింది. దీని వల్ల "మేక్ ఇన్ ఇండియా" పథకంపై ప్రతికూల ప్రభావం పడుతుందని షియోమీ ఇండియా ఎండీ మనూ జైన్ అన్నారు. కనీసం 200 డాలర్ల కన్నా తక్కువ విలువైన ఫోన్లకైనా 18 శాతం జీఎస్టీ నుంచి మినహాయింపు ఇవ్వాలని కోరారు.
ఇదీ చూడండి:కరోనా ఎఫెక్ట్: ఏసీల ధరలు 3 శాతం వరకు పెంపు
