ప్రైవేటుపరం చేసిన దిల్లీ, బెంగళూరు, ముంబయి, హైదరాబాద్ విమానాశ్రయాల్లో అట్టిపెట్టుకున్న ప్రభుత్వ వాటాను కూడా పూర్తిగా అమ్మేందుకు కేంద్రం సిద్ధమైంది. రెండున్నర లక్షల కోట్ల రూపాయల మేర వనరులను నిధులుగా మార్చాలన్న లక్ష్యంలో భాగంగా ఈ నిర్ణయం తీసుకుంది.
ఈ నాలుగు విమానాశ్రయాల్లో భారత విమానాశ్రయ అథారిటీ(ఏఏఐ) వాటాను విక్రయించనుంది కేంద్రం. ఈ విమానాశ్రయాల్లో ఏఏఐకి 26 శాతం వాటా ఉంది. త్వరలో ఈ విక్రయానికి సంబంధించి మంత్రిమండలి కూడా ఆమోదం తెలపనున్నట్లు సమాచారం. దీంతో పాటు 2021-22వ ఆర్థిక సంవత్సరంలో బేరానికి పెట్టేందుకు మరో 13 విమానాశ్రయాలను కూడా గుర్తించినట్లు తెలుస్తోంది.
తొలి దశలో..
విమానాశ్రయాల తొలిదశ ప్రైవేటీకరణలో భాగంగా గతేడాది అదానీ సంస్థలు.. లఖ్‌నవూ, అహ్మదాబాద్‌, జైపుర్, మంగళూరు, తిరువనంతపురం, గువాహటి విమానాశ్రయాలను దక్కించుకున్నాయి. పౌర విమానయాన శాఖ పరిధిలోని ఏఏఐ అధీనంలో.. దాదాపు 100 విమానాశ్రయాలు పనిచేస్తున్నాయి.
ఏప్రిల్ 1 నుంచి మొదలయ్యే నూతన ఆర్థిక సంవత్సరంలో రూ.1.75 లక్షల కోట్ల రూపాయల విలువైన ఆస్తుల్ని నిధులుగా మార్చాలని నరేంద్రమోదీ సర్కారు లక్ష్యంగా పెట్టుకుంది.
ఇదీ చదవండి: 'నౌక, విమానాశ్రయాల్లో ప్రభుత్వ వాటాను అమ్మబోం'
