కరోనా వైరస్ బాధితులకు ఉపశమనం కలిగిస్తున్న యాంటీ-వైరల్‌ ఔషధం 'రెమిడెసివిర్'ను విస్తృత స్థాయిలో అందుబాటులోకి తెచ్చేందుకు అమెరికా సంస్థ గిలీడ్ సైన్సెస్ ముందడుగు వేసింది. ఈ ఔషధం తయారీ, విక్రయాల్లో మూడు భారతీయ ఔషధ కంపెనీలను భాగస్వాములుగా చేర్చుకుంది. ఈ మేరకు ఆయా సంస్థలతో నాన్‌-ఎక్స్‌క్లూజివ్‌ లైసెన్సింగ్‌ ఒప్పందం కుదుర్చుకుంది గిలీడ్ సైన్సెస్. ఇందులో ముంబయి కేంద్రంగా పనిచేస్తున్న సిప్లా, హైదరాబాద్ కేంద్రంగా ఉన్న హెటిరో ల్యాబ్స్, నోయిడాలో ఉన్న జుబిలెంట్ లైఫ్ సైన్సెస్ ఉన్నాయి.
ఉపయోగమేంటి?
ఈ లైసెన్సింగ్‌ ఒప్పందం ద్వారా ఈ మూడు సంస్థలకు గిలీడ్ నుంచి సాంకేతికత బదిలీ అవుతుంది. సంబంధిత దేశాల్లో కొవిడ్‌-19 రోగులకు 'రెమిడెసివిర్' ఔషధం వీలైనంత త్వరగా అందుబాటులోకి తెచ్చేందుకు, ఆయా దేశాల నియంత్రణ సంస్థల ఆమోదంతో ఉత్పత్తి పెంచేందుకు ఇది దోహదం చేస్తుంది. ఇప్పటికే ఈ మందును కొవిడ్‌-19 బాధితులపై వినియోగించడానికి అమెరికా ఔషధ నియంత్రణ సంస్థ (యూఎస్‌ఎఫ్‌డీఏ) ఇప్పటికే అత్యవసర అనుమతి (ఎమెర్జెన్సీ యూజ్‌ ఆథరైజేషన్‌) ఇచ్చింది.
అమెరికా కేంద్రంగా ఉన్న మందుల తయారీ సంస్థ మైలాన్, పాకిస్థాన్లోని ఫిరోజ్సన్స్ ల్యాబొరేటరీస్ కూడా గిలీడ్తో ఒప్పందం కుదుర్చుకున్నాయి. ఈ ఒప్పందాలు ఎక్కువ కాలం కొనసాగిస్తే భారత్, పాక్ దేశాలు.. అభివృద్ధి చెందుతున్న దేశాలకు భారీ స్థాయిలో డ్రగ్ అందిచగలవని కొందరు నిపుణులు అభిప్రాయపడుతున్నారు.
గతంలోనూ..
'రెమిడెసివిర్' ఔషధంపై గిలీడ్ సైన్సెస్‌కు దాదాపు 70 దేశాల్లో 2,031 వరకు పేటెంట్లు ఉన్నాయి. అందువల్ల గిలీడ్‌ను కాదని ఇతర కంపెనీలు ఈ ఔషధాన్ని తయారు చేయటం సాధ్యం కాదు. భాగస్వామ్యాలు కుదుర్చుకుంటేనే అది సాధ్యం. గతంలో స్వైన్‌ఫ్లూ వచ్చినప్పుడు కూడా, ఆ జబ్బును అదుపు చేసే ఔషధమైన 'ఒసెల్టామివిర్‌' ఔషధం తయారీకి గిలీడ్ సైన్సెస్... మనదేశంలోని ఫార్మా కంపెనీలను 'వాలంటరీ లైసెన్స్‌' పద్ధతిలో భాగస్వాములగా చేసుకుంది. అదే పద్ధతిని ఇప్పుడు కూడా అనుసరిస్తోంది.
ఐసీఎంఆర్ అనుమతి కావాలి?
ఇండియన్‌ కౌన్సిల్‌ ఆఫ్‌ మెడికల్‌ రీసర్చ్‌ (ఐసీఎంఆర్) నుంచి అనుమతులు పొందిన వెంటనే హైదరాబాద్లోనే ఈ మందు తయారు చేయనున్నట్లు హెటిరో సంస్థ ప్రకటించింది.
ప్రస్తుత ఒప్పందం ప్రకారం... సిప్లా సంస్థ యాక్టివ్ ఫార్మాస్యూటికల్ ఇంగ్రీడియంట్(ఏపీఐ)ను తయారు చేసి, అంతిమ వస్తువును అదే బ్రాండ్తోనే 127 దేశాల్లోని అమ్మకాలు జరపనుంది.
"మాకు అందించిన ప్రాథమిక సమాచారం మేరకు, కొవిడ్‌-19 వ్యాధి చికిత్సలో వినియోగిస్తున్న రెమిడెసివిర్‌తో రోగులు కోలుకొనే అవకాశాలు ఎక్కువగా కనిపిస్తున్నాయి. మేము క్లినికల్‌ పరీక్షలను దగ్గరగా పరిశీలిస్తున్నాం. అలాగే నియంత్రణ సంస్థల అనుమతులు పొంది, తొందర్లోనే ఈ ఔషధాన్ని విడుదల చేయడానికి సన్నాహాలు చేస్తున్నాం" అని జుబిలెంట్ లైఫ్ సెన్సెస్‌ సంస్థ ప్రతినిధులు వెల్లడించారు.
కరోనా వైరస్ను కట్టడి చేస్తూ, బాధితులు వేగంగా కోలుకునేందుకు ఈ మందు సహాయపడుతుంది. అయితే ఇది ఎక్కువగా తీసుకోవడం వల్ల కిడ్నీ సంబంధిత వ్యాధులు వస్తున్నట్లు ఓ నివేదిక తెలిపింది.
