భారత్ స్టేజ్ (బీఎస్)-4 వాహనాల విక్రయాలకు ఈ నెలాఖరుతో గడువు ముగియనున్న నేపథ్యంలో ఫెడరేషన్ ఆఫ్ ఆటోమొబైల్ డీలర్స్ అసోసియేషన్ (ఫాడా) సుప్రీం కోర్టు తలుపు తట్టింది. ప్రస్తుత గడువు(మార్చి 31)లోగా బీఎస్-4 స్టాక్ను విక్రయించలేమని.. మే 31 వరకు అమ్మకాలకు అనుమతివ్వాలని పిటిషన్ దాఖలు చేసింది. ఈ అంశంపై అత్యవసర విచారణ చేయాలని కోరినట్లు తెలిపారు ఫాడా అధ్యక్షుడు ఆశిష్ హర్షరాజ్ కాలే.
విక్రయం కాని ద్విచక్రవాహనాలు 8.35 లక్షలు..
డీలర్ల వద్ద ప్రస్తుతం 8.35 లక్షల బీఎస్-4 విక్రయం కాని ద్విచక్ర వాహనాలు ఉన్నాయి. వీటి విలువ దాదాపు రూ.4,600 కోట్ల వరకు ఉండొచ్చు అని ఆశిష్ తెలిపారు. వాణిజ్య, ప్యాసింజర్ వాహనాల పరిస్థితి ద్విచక్ర వాహనాలతో పోలిస్తే కాస్త మెరుగ్గా ఉన్నట్లు పేర్కొన్నారు.
గడువు పెంచాలని ఫిబ్రవరి 14నే ఫాడా పిటిషన్ దాఖలు చేయగా సుప్రీం దాన్ని తిరస్కరించింది.
''అప్పటితో పోలిస్తే ఇప్పుడు పరిస్థితులు తలకిందులయ్యాయి. కరోనా వైరస్ వ్యాప్తితో అమ్మకాలు భారీగా క్షీణించాయి. వినియోగదారులు కొనుగోళ్లపై పెద్దగా దృష్టి సారించడం లేదు. కరోనా వైరస్ నేపథ్యంలో డీలర్లకు 60 నుంచి 70 శాతం వరకు విక్రయాలు తగ్గాయి. గత 3,4 రోజుల నుంచి పలు పట్టణాల్లో పరిస్థితులు మరీ క్లిష్టంగా మారాయి.''
- ఆశిష్ హర్షరాజ్ కాలే, ఫాడా అధ్యక్షుడు
సియామ్ మరో పిటిషన్..
బీఎస్-4 వాహనాల విక్రయాలకు ఈ నెల 31 వరకు గడువు ఉండగా.. కొన్ని రాష్ట్రాలు ఫిబ్రవరి 29 నుంచి మార్చి 29 వరకే అందుకు అనుమతిస్తున్నట్లు వాహన పరిశ్రమల విభాగం సియామ్ తెలిపింది. ఏప్రిల్ 1నుంచి బీఎస్-6 వాహనాలకే రిజిస్ట్రేషన్లు ఉంటాయని స్పష్టం చేసినట్లు తెలిపింది. ఈ విషయాలన్నింటిపైన సియామ్ కూడా ఇటీవలే సుప్రీంలో పిటిషన్ దాఖలు చేయడం గమనార్హం. రాష్ట్రాలు తీసుకున్న ఈ నిర్ణయాలు అటు డీలర్లతో పాటు కొనుగోలుదారులకు ఇబ్బందులు ఎదురవుతున్నట్లు పిటిషన్లో పేర్కొంది.
