సామాజిక మాధ్యమ దిగ్గజం ఫేస్బుక్... తన భారతీయ ఖాతాదారుల కోసం ఓ కొత్త ఫీచర్ను తీసుకొచ్చింది. దీనితో ఫేస్బుక్ ఖాతాదారులు తమ ప్రొఫైల్ను లాక్ చేసుకోవచ్చు. ఫలితంగా అపరిచితులు.. అనుమతి లేకుండా వారి ప్రొఫైల్, ఫోటోలను చూడకుండా నిలువరించవచ్చు.
ప్రైవసీకి ప్రాధాన్యం..
తమ వేదికను మరింత సురక్షితమైనదిగా చేయడమే తాజా ఫీచర్ లక్ష్యమని ఫేస్బుక్ తెలిపింది. ఖాతాదారుల గోప్యతకు భంగం కలుగకుండా చూడడం... ముఖ్యంగా మహిళలకు ఎలాంటి ఇబ్బంది కలుగకుండా చూడడమే ఈ ఫీచర్ ప్రధాన ఉద్దేశమని స్పష్టం చేసింది.
ఈ ఫీచర్ ఎనేబుల్ చేస్తే..
ఫేస్బుక్ ఖాతాదారులు 'ప్రొఫైల్ లాక్' ఫీచర్ను ఎనేబుల్ చేస్తే... అప్పటి నుంచి వారి ప్రొఫైల్ను ఎవ్వరూ అనుమతి లేకుండా చూడలేరు. ఫోటో జూమ్, షేర్, డౌన్లోడ్ చేసే అవకాశమూ ఉండదు. అలాగే యూజర్ టైమ్లైన్లోని ఫోటోలు, పోస్టులను కూడా వీక్షించలేరు.
అలాగే ఓ ఫేస్బుక్ యూజర్ ప్రొఫైల్ని... అపరిచితులు(నాన్-ఫ్రెండ్) సందర్శించాలని ప్రయత్నించినప్పుడల్లా ఒక పాప్-ఆప్ వస్తుంది. సదరు ఖాతాదారుడు తన ప్రొఫైల్ను లాక్ చేశాడని అది చెబుతుంది. ఫేస్బుక్ ప్రకారం, ఓ నాన్ ఫ్రెండ్కి ఐదు ప్రొఫైల్స్ వివరాలు మాత్రమే కనిపిస్తాయి.
ప్రస్తుతానికి ఈ 'ప్రొఫైల్ లాక్ ఫీచర్' ఆండ్రాయిడ్ వినియోగదారులకు మాత్రమే అందుబాటులో ఉంది.
ఇదీ చూడండి: 'వర్క్ ఫ్రమ్ హోమ్' ఉద్యోగాల కోసం భారతీయుల వేట
