కరోనా అనంతర పరిస్థితుల కారణంగా.. దేశీయంగా విమాన రాకపోకలు భారీగా తగ్గాయి. ఇంధన ధరలు కొండెక్కి కూర్చున్నాయి. దీనికి తోడు అంతర్జాతీయ విమాన ప్రయాణాలు పాక్షికంగా సాగుతున్నాయి. ఈ పరిస్థితులన్నీ దేశీయ విమానయాన సంస్థలకు ఈ ఆర్థిక సంవత్సరం(2021-22) రూ.9,500- రూ.10,000 కోట్ల నష్టాన్ని మిగల్చనున్నట్లు ప్రముఖ రేటింగ్ ఏజెన్సీ క్రిసిల్ అంచనా వేసింది. అయితే గత ఆర్థిక సంవత్సరంతో పోలిస్తే (రూ.14-15 వేల కోట్లు) ఈ నష్టాలు 35-40 శాతం తక్కువగా ఉండొచ్చని పేర్కొంది.
దేశీయ విమానయాన రంగంలో మూడు అతి పెద్ద సంస్థలపై జరిపిన విశ్లేషణ ఆధారంగా రూపొందించిన నివేదికలో ఈ విషయాలు పేర్కొంది క్రిసిల్. ప్యాసింజర్ ట్రాఫిక్ పరంగా ఈ మూడు విమాన సంస్థల వాటానే 78 శాతం.
నివేదికలో తేలిన మరిన్ని విషయాలు..
- 2020-21లో 25-30 శాతం పెరిగిన రుణాలు(లీజింగ్ లియబిలిటీస్ మినహాయించి).. ప్రస్తుత ఆర్థిక సంవత్సర నష్టాలకు కారణం కానున్నాయి. దీని వల్ల విమానయాన సంస్థల బ్యాలెన్స్ షీట్లపై తీవ్ర ఒత్తిడి పడనుంది.
- దేశవ్యాప్తంగా.. ముఖ్యంగా ముంబయి, దిల్లీ వంటి ప్రధాన నగరాల్లో (ఎయిర్ట్రాఫిక్లో 36 శాతం వాటా ఈ నగరాలదే) కరోనా కేసులు పెరుగుతుండటం వల్ల ఈ రంగం రికవరీ మరో ఆరు నెలలు ఆలస్యం అవ్వొచ్చు.
- కేసులు పెరగటం వల్ల రోజువారీ దేశీయ విమాన ప్రయాణికుల సంఖ్య.. ఏప్రిల్లో 20 శాతం (ఫిబ్రవరితో పోలిస్తే) తగ్గింది. ఫిబ్రవరిలో రోజుకు సగటున 2.35 లక్షల మంది విమానాల్లో ప్రయాణించారు.
- దేశీయ ప్రయాణికుల ద్వారా వచ్చే(విమానయాన సంస్థల రెవెన్యూలో 75 శాతం వాటా) ఆదాయం ఈ ఆర్థిక సంవత్సరం 132-130 శాతం పెరగొచ్చు. 2019-20తో పోలిస్తే మాత్రం ఈ మొత్తం 70 శాతం తక్కువే. లాక్డౌన్ వల్ల గత ఆర్థిక సంవత్సరం ఈ ఆదాయం 68 శాతం తగ్గింది.
- ఏటీఎఫ్(విమానాల్లో వాడే ఇంధనం) ధర పెరగటం వల్ల విమాన సంస్థల ఖర్చులు మరింత పెరిగాయి. 2020 నవంబర్ నుంచి ఏటీఎఫ్ ధరలు 30 శాతం పెరిగాయి.
ఇదీ చదవండి:అత్యవసర నిధి ఏర్పాటు చేసుకున్నారా?
