స్మార్ట్​ఫోన్​కు రక్షణ కల్పించే కండోమ్​ గురించి తెలుసా?

ప్రస్తుతం స్మార్ట్​ఫోన్ వినియోగం భారీగా పెరిగింది. ఈ నేపథ్యంలో సైబర్​ నేరగాళ్లు స్మార్ట్​ఫోన్లను లక్ష్యంగా చేసుకుని ఛార్జింగ్ పాయింట్ల ద్వారా యూజర్ల విలువైన సమాచారాన్ని దొంగిలిస్తున్నారు. వీటిని నివారించేందుకు మార్కెట్లో యూఎస్​బీ కండోమ్స్ అనే పరికరాలు అందుబాటులో ఉన్నాయి. అవి ఎలా పని చేస్తాయి, వాటి ఉపయోగమేంత? అనే పూర్తి సమాచారం మీ కోసం.

మీ స్మార్ట్​ఫోన్​కు రక్షణనిచ్చే కండోమ్​ గురించి తెలుసా? మీరు విన్నది నిజమే.. స్మార్ట్​ఫోన్​కు రక్షణనిచ్చే కండోమ్​ మార్కెట్లో దొరుకుతుంది. ఇంతకి స్మార్ట్​ ఫోన్​కు రక్షణగా కండోమ్ ఏంటనుకుంటున్నారా? అయితే ఈ కథనం పూర్తిగా చదవాల్సిందే.

సాంకేతికత రోజురోజుకు పెరుగుతోంది. టెక్నాలజీతో పాటే మోసాలు చేసే వారూ పెరుగుతున్నారు. ముఖ్యంగా అజ్ఞాత ప్రదేశాల్లో స్మార్ట్​ ఫోన్​ ఛార్జీంగ్​ పెట్టడం వల్ల ఈ మోసాలు ఎక్కువగా జరుగుతున్నాయి. వీటిని అరికట్టేందుకు తీసుకొచ్చిందే 'యూఎస్​బీ కండోమ్'​. దీన్నే 'డేటా బ్లాకర్​' అని.. అధికారికంగా 'పోర్టాపావ్​' మూడోతరం యూఎస్​బీ డేటా బ్లాకర్ అని కూడా పిలుస్తారు.

ఎలా పనిచేస్తుంది..

ప్రస్తుతం స్మార్ట్​ఫోన్లకు ఛార్జింగ్ అనేది పెద్ద తల నొప్పిగా మారింది. ఇంట్లో ఉన్నప్పుడు ఇది పెద్ద సమస్యకాకపోయినప్పటికీ.. ప్రయాణాల సమయంలో చాలా ఇబ్బందిగా ఉంటుంది. ఇందుకోసం పవర్​ బ్యాంక్​లు ఉన్నా.. ఒకటి రెండు సార్లకన్నా ఎక్కువగా ఫోన్​ను ఛార్జింగ్​ చేయలేం. అలా ప్రయాణ సమయాల్లో ఉన్నప్పుడు రైల్వే స్టేషన్లలో, బస్టాండ్లలో ఎక్కడపడితే అక్కడ ఛార్జింగ్ పెట్టుకుంటారు చాలా మంది. అయితే అక్కడ ఛార్జింగ్ పెట్టుకోవడం ఎంత సురక్షితమని చాలా మంది అలోచించరు. అలాంటి ఛార్జింగ్​ స్పాట్​లను లక్ష్యంగా చేసుకుని స్కామర్లు చాలా మంది స్మార్ట్​ఫోన్​ యూజర్ల డేటాను చోరీ చేస్తున్నారు. అదేలా అంటే స్మార్ట్​ ఫోన్​ను ఆయా ఛార్జింగ్​ పాయింట్ల దగ్గర ఛార్జ్ చేసేందుకు కేబుల్ ద్వారా కనెక్ట్​ చేసినప్పుడు నేరుగా ఆ ఫోన్ల డేటా స్కామర్ల చేతికి వెళ్తోంది. దీని ద్వారా ఆనేక మోసాలు జరుగుతున్నాయి.

అయితే.. కొత్త ప్రదేశాల్లో నేరుగా ఏదైన ఛార్జింగ్​ పోర్ట్​కు అనుసంధానం చేయాల్సి వచ్చినప్పుడు మీ డేటా.. చోరీకి గురవ్వకుండా ఉండేందుకు ఈ డేటా బ్లాకర్ అనే పరికరం ఉపయోగపడుతుంది.

ఎలా వాడాలి.. ధరెంత?

ఫోన్​ ఛార్జింగ్ పెట్టెడప్పుడు..ఛార్జర్​కు అనుసంధానం చేసే చివర ఈ డేటా బ్లాకర్​ పరికరాన్ని ప్లగ్​ ఇన్​ చేయాలి. దానికి యూఎస్​బీ కేబుల్​ను అనుసంధానం చేసి ఫోన్​ ఛార్జింగ్ చేసుకోవాలి. ఇది మీ ఫోన్​లో ఉన్న డేటా కేబుల్​ ద్వారా ట్రాన్స్​ఫర్​ కాకుండా చూస్తుంది. దీంతో మీ స్మార్ట్​ఫోన్ ఛార్జింగ్ ఎక్కడ పెట్టినా.. డేటా సురక్షితంగా ఉంటుంది.

ప్రస్తుతం మార్కెట్లో యూఎస్​బీ కండోమ్​ ధర దాదాపు రూ.500గా ఉంది. అయితే యూఎస్​బీ-సీ డివైజ్​లకు ఈ డేటా బ్లాకర్​ పని చేయదు. త్వరలోనే టైప్​-సీ పోర్ట్​కు సరిపోయే యూఎస్​బీ కండోమ్ మార్కెట్లోకి రానుంది.

ఇదీ చూడండి:నవంబర్​లో మళ్లీ తగ్గిన వాహన విక్రయాలు