అభివృద్ధిని పరుగులు పెట్టించేందుకు మౌలిక సదుపాయాల కల్పనపై బడ్జెట్లో ప్రధానంగా దృష్టిసారించింది కేంద్రం. 2021-22 సంవత్సరానికి పెట్టుబడి వ్యయాన్ని 34.5 శాతాన్ని పెంచి.. రూ. 5.5 లక్షల కోట్లకు చేర్చుతున్నట్లు ప్రకటించింది.
గత బడ్జెట్లో ప్రస్తుత ఆర్థిక సంవత్సరానికి ప్రతిపాదించిన రూ. 4.12 లక్షల కోట్ల పెట్టుబడి వ్యయాన్ని మరింత పెంచనున్నట్లు తెలిపారు కేంద్ర ఆర్థిక మంత్రి నిర్మలా సీతారామన్. ఈ మేరకు 2020-21 బడ్జెట్ అంచనాలను సవరిస్తూ.. ఈ వ్యయాన్ని రూ. 4.39 లక్షల కోట్లకు పెంచిన్నట్లు పేర్కొన్నారు.
"2020-21 పెట్టుబడుల బడ్జెట్ అంచనాలు గణనీయంగా పెరిగాయి. రూ.4.12 లక్షల కోట్లను ఈ(పెట్టుబడి) వ్యయం కోసం ప్రతిపాదించాం. నిధుల కొరత ఉన్నప్పటికీ పెట్టుబడి వ్యయాన్ని అధికం చేయాలని అనుకుంటున్నాం. ఈ ఏడాదిని రూ.4.39 లక్షల కోట్లతో ముగించాలని భావిస్తున్నాం."
-నిర్మలా సీతారామన్, కేంద్ర ఆర్థికమంత్రి
మరోవైపు, అసెంబ్లీ ఎన్నికలు జరగనున్న రాష్ట్రాల్లో మౌలిక సదుపాయాల కల్పనకు బడ్జెట్లో పెద్ద పీట వేసింది కేంద్రం. అసోం, తమిళనాడు, బంగాల్, కేరళ రాష్ట్రాల్లో జాతీయ రహదారుల అభివృద్ధి కోసం ప్రాజెక్టులను ప్రకటించింది.
బంగాల్లో 675 కి.మీ. మేర జాతీయ రహదారుల అభివృద్ధి చేపట్టనున్నట్లు కేంద్ర ఆర్థిక మంత్రి నిర్మలా సీతారామన్ తెలిపారు. 2022 జూన్ నాటికి తూర్పు, పశ్చిమ ప్రత్యేక సరకు రవాణా కారిడార్లను అభివృద్ధి చేయనున్నట్లు వెల్లడించారు. ఖరగ్పుర్, విజయవాడ మధ్య ఈస్ట్-కోస్ట్ సరకు రవాణా కారిడార్ను నెలకొల్పనున్నట్లు పేర్కొన్నారు.
మౌలిక వసతుల ఆదాయ వనరుల కోసం ప్రత్యేక సంస్థను ఏర్పాటు చేయనున్నట్లు బడ్జెట్ ప్రసంగంలో నిర్మలా సీతారామన్ వెల్లడించారు. బ్రౌన్ఫీల్డ్ మౌలిక ఆస్తుల కోసం నేషనల్ మానెటైసేషన్ పైప్లైన్ను ఆవిష్కరించనున్నట్లు తెలిపారు. ఉత్పత్తి ఆధారిత ప్రోత్సాహక పథకాని(పీఎల్ఐ)కి అనుబంధంగా మెగా ఇన్వెస్ట్మెంట్ టెక్స్టైల్ పథకాన్ని ప్రవేశపెట్టనున్నట్లు వివరించారు.
