మహమ్మారి అనంతరం.. భారతీయుల సగటు స్మార్ట్ఫోన్ వినియోగం 25 శాతంపెరిగి దాదాపు 7 గంటలకు చేరిందని ఓ నివేదిక తెలిపింది. ఆన్లైన్ క్లాసులు, వర్క్ ఫ్రం హోమ్ వంటి అవసరాల వల్ల స్మార్ట్ఫోన్ వాడకం పెరిగిందని వెల్లడించింది. 'స్మార్ట్ ఫోన్లు, మానవ సంబంధాలపై వాటి ప్రభావం-2020' పేరుతో వివో ఇండియా, సీఎమ్ఆర్ సంస్థలు సంయుక్తంగా ఈ సర్వే చేపట్టాయి.
నివేదికలోని ముఖ్యాంశాలు..
- 2019లో సగటు వినియోగం 4.9 గంటలుగా ఉండగా.. 2020 మార్చిలో 11 శాతం పెరిగి 5.5 గంటలకు చేరింది. ఏప్రిల్ తర్వాత ఇది సగటున 25 శాతం పెరిగి 6.9 గంటలకు చేరింది.
- లాక్డౌన్ తర్వాత వర్క్ ఫ్రమ్ హోమ్ కోసం భారతీయులు ఎక్కువ సమయం స్మార్ట్ఫోన్లలో గడుపుతున్నారు. వర్క్ ఫ్రమ్ హోమ్ కోసం స్మార్ట్ ఫోన్లు వాడే సమయం 75 శాతం పెరిగింది.
- ఫోన్ కాలింగ్ కోసం వెచ్చించే సమయం 63 శాతం పెరిగింది.
- ఓటీటీల కోసం గడిపే సమయం 59 శాతం పెరిగింది.
- సామాజిక మాధ్యమాల్లో గడిపే సమయం 55శాతం పెరిగింది.
- ఆన్లైన్ గేమింగ్ కోసం 45 శాతం ఎక్కువగా గడుపుతున్నారు.
- అహ్మదాబాద్, బెంగళూరు, పుణె, హైదరాబాద్ వంటి మెట్రో నగరాలు సహా 8 నగరాల్లోని 15 నుంచి 45 ఏళ్ల మధ్య వయస్సు గల వారిపై ఈ అధ్యయనం చేపట్టారు.
అయితే ఈ లాక్డౌన్ తర్వాత కుటుంబాలతో గడిపే సమయం 26 శాతం పెరిగిందని నివేదిక చెబుతోంది. కానీ, చాలా మంది తమకిష్టమైన వారితో గడిపే సమయంలో స్మార్ట్ఫోన్ వినియోగించడం వల్ల అది నాణ్యతపై ప్రభావం పడుతున్నట్లు సర్వేలో పాల్గొన్న వారు అంగీకరించారు.
"లాక్డౌన్లో చాలా మంది ఫోన్ వినియోగించారు. ఇలా ఎక్కువగా స్మార్ట్ ఫోన్ వినియోగం వల్ల జరిగే నష్టాలు తెలుసుకునేందుకే మేం ఈ సర్వే చేశాం. స్మార్ట్ ఫోన్ అందరికీ ఓ వ్యసనంలా మారుతోంది. 84 శాతం మంది ప్రతి 15 నిమిషాలకొకసారి తమ స్మార్ట్ ఫోన్ను చూసుకుంటున్నారు. 46 శాతం మంది గంటసమయంలో కనీసం 5 సార్లు తమ ఫోన్ కోసం వెతుకుతున్నారు. "
-- వివో ఇండియా డైరెక్టర్, నిపున్ మర్యా
74 శాతం మంది తాము స్మార్ట్ఫోన్ వినియోగించడాన్ని ఆపేస్తే అసహనానికి లోనవుతున్నట్లు సర్వే తెలిపింది. స్మార్ట్ఫోన్ వాడకం పెరిగితే.. తమ మానసిక, శారీరక ఆరోగ్యం దెబ్బతింటుందని 70 శాతం మంది అంగీకరించారని తెలిపింది.
ఇదీ చూడండి:కొత్తదైనా... పాతదైనా... కారు కారే కదా!
