లాక్డౌన్ తర్వాత పది రోజుల వరకు 10 శాతం బీఎస్4 (ఇప్పటికే ఉన్న స్టాక్) వాహనాలను విక్రయించుకునేందుకు డీలర్లకు సుప్రీం కోర్టు అనుమతిచ్చింది. ఆ గడువు కూడా ఇటీవల ముగిసింది. ఈ నేపథ్యంలో మరోసారి గడువు పెంచాలని డీలర్లు చేసిన విన్నపాన్ని అత్యున్నత న్యాయస్థానం తోసిపుచ్చింది. అయితే డీలర్లు మాస్టర్ ప్లాన్ వేశారు. మిగతా స్టాక్ను తమ పేర్ల మీద రిజిస్టర్ చేసుకుని.. అవే వాహనాలను సెకండ్ బ్యాండ్లో విక్రయిస్తున్నాయి.
మరి వీటిని కొనడం సురక్షితమేనా? సురక్షితమైతే వీటిని కొనడం వల్ల వచ్చే ప్రయోజనాలు ఏమిటి? ఆ విషయాలు చూద్దాం.
సెకండ్ హ్యాండ్ విక్రయాలకు కారణాలు..
తమ వద్దనున్న బీఎస్ 4 వాహనాలను డీలర్లు ఇప్పటికే రిజిస్ట్రేషన్ చేయించుకున్నారు. డిస్కౌంట్లు ప్రకటించి.. సెకండ్ హ్యాండ్ లో వాటిని విక్రయిస్తున్నట్లు కొందరు చెబుతున్నారు. భారీ డిస్కౌంట్లతో చాలా వరకు బీఎస్-4 స్టాక్ విక్రయించగలిగామని అంటున్నారు. గడువు ముగిసిన కారణంగా మిగితా స్టాక్ను ఇలా సెకండ్ హ్యాండ్లో విక్రయిస్తున్నట్లు తెలిపారు.
ఎగుమతి చేసేందుకు, వేరే రాష్ట్రాల్లో అమ్ముకునేందుకు తమకు అనుమతులు లేనందున ఇలా చేస్తున్నట్లు తెలిపారు. అయితే వాహన తయారీ కంపెనీలు మాత్రం ఎగుమతి చేసేందుకు అవకాశం ఉంది.
వీటిని కొనడం వల్ల లాభాలు ఏమిటి?
షోరూంలలో ఏవైనా బీఎస్ 4 వాహనాలు ఉన్నట్లయితే ప్రస్తుతం అవి రిజిస్ట్రర్ అయి ఉంటాయి. వాటిని సెకండ్ హ్యాండ్లో కొనుగోలు చేసుకోవచ్చు. వాటిని ఆన్ రోడ్ ఫ్రైజ్ కంటే తక్కువ ధరకు పొందవచ్చు. రోడ్ ట్యాక్స్, బీమా వంటి ఛార్జీలు తగ్గుతాయని డీలర్లు చెబుతున్నారు.
మొత్తం మీద 15 నుంచి 20 శాతం వరకు తక్కువ ధరకే ఆ వాహనాలను సొంతం చేసుకోవచ్చు. దీనితో పాటు విక్రయదారులు ఇచ్చే డిస్కౌంట్లతో అదనపు ప్రయోజనం కూడా పొందవచ్చు.
ఇదీ చూడండి:ప్రతికూలానికి భారత వృద్ధి అంచనాలు: ఫిచ్
