కరోనా మహమ్మారి దెబ్బకు విమానయాన సంస్థలు పీకల్లోతు నష్టాల్లో కూరుకుపోతున్నాయి. గతంలో భారీగా ఉండే విమాన ప్రయాణాలు ఒక్కసారిగా తగ్గాయి. ఈ నేపథ్యంలో ఉద్యోగులకు జీతాలిచ్చే పరిస్థితి లేనందున 25వేల మంది సిబ్బందిని అక్టోబరులో తొలగించనున్నట్లు అమెరికన్ ఎయిర్లైన్స్ ప్రకటించింది. ఈ మేరకు ఉద్యోగులకు నోటీసులు జారీ చేసినట్లు పేర్కొంది.
వేతనాల్లో కోతకు, రెండేళ్లపాటు పెయిడ్ లీవ్స్ వదులుకునేందుకు సిబ్బంది అంగీకరిస్తే ఉద్యోగాలు కోల్పోయేవారి సంఖ్య తగ్గుతుందని అమెరికన్ ఎయిర్లైన్స్ నిర్వాహకులు తెలిపారు.
భవిష్యత్తులో విమాన ప్రయాణాలకు డిమాండ్ భారీగా తగ్గిపోతుందని.. సంస్థలకు నష్టాలు తప్పవని తెలిసి ముందు జాగ్రత్త చర్యగా ఈ నిర్ణయం తీసుకున్నట్లు అమెరికన్ ఎయిర్లైన్స్ సీఈఓ డాగ్ పార్కర్ చెప్పారు.
ఏప్రిల్ మధ్యకాలం నుంచి విమాన ప్రయాణాల సంఖ్య స్వల్పంగా పెరిగినప్పటికీ గతేడాది జూన్ ఆదాయంతో పోల్చితే ఈ ఏడాది జూన్ ఆదాయం 80 శాతం తగ్గినట్లు సంస్థ వెల్లడించింది.
అక్టోబరు వరకు సంస్థల్లో ఉద్యోగులను తొలగించకుండా ఉండేందుకు 25 బిలియన్ డాలర్ల ఆర్థిక సాయాన్ని అమెరికా ప్రభుత్వాన్ని కోరాయి అక్కడి ఎయిర్లైన్ సంస్థలు. అమెరికన్ ఎయిర్లైన్స్కు 5.8 బిలియన్ డాలర్ల ఆర్థిక సాయం అందింది. ఈ సాయం ఉద్యోగులను అక్టోబరు వరకు మాత్రమే కాపాడగలిగింది.
అమెరికాలోని ఇతర విమానయాన సంస్థలు కూడా సిబ్బందిని భారీగా తొలగిస్తున్నాయి. 36వేల మందిని తప్పించనున్నట్లు గతవారమే ప్రకటించింది యునైటెడ్ ఎయిర్లైన్స్. 17వేల మంది సంస్థ నుంచి తప్పుకునేందుకు అంగీకరించినట్లు డెల్టా ఎయిర్లైన్స్ ఈ వారమే ప్రకటించింది.
