ఐటీ గ్రిడ్ సంస్థ కేసులో సైబరాబాద్ పోలీసులు దర్యాప్తు ముమ్మరం చేశారు. ఇప్పటికే సంస్థ కార్యాలయంలో తనిఖీలు నిర్వహించి హార్డ్డిస్క్లు, పత్రాలు స్వాధీనం చేసుకున్నారు. ఏపీ ప్రజల వ్యక్తిగత, సున్నితమైన సమాచారం ఉన్నట్లు గుర్తించారు. సంస్థ సంచాలకులు అశోక్పై కేసు నమోదు చేసి.. అతని కోసం గాలిస్తున్నారు. కేసు దర్యాప్తునకు ఏపీ పోలీసులు ఆటంకం కలిగించేలా వ్యవరించారని పోలీసులు ఆక్షేపించారు. ఫిర్యాదుదారుడు లోకేశ్వర్ రెడ్డిని బెదిరించిన కేసులో కేపీహెచ్బీ ఠాణాలో ఏపీ పోలీసులపై కేసు నమోదైంది.
ఏపీ ఓటర్ల వ్యక్తిగత సమాచారాన్ని అక్రమంగా సేవామిత్ర యాప్లో పొందుపరుస్తున్నారని తుమ్మల లోకేశ్వర్ రెడ్డి ఇచ్చిన ఫిర్యాదుతో మాదాపూర్ పోలీసులు ఐటీ గ్రిడ్ సంస్థపై కేసు నమోదు చేశారు. ఆ సంస్థ నలుగురు ఉద్యోగులను పోలీసులు విచారించారు. వాళ్లు ఇచ్చిన సమాచారంతో పాటు...స్వాధీనం చేసుకున్న హార్డ్ డిస్క్, ల్యాప్టాప్ లను విశ్లేషించి.. ఐటీ గ్రిడ్ నిబంధనలను ఉల్లంఘించినట్లు నిర్ధరించుకున్నారు.
ఆధార్ కార్డు, ఓటర్ గుర్తింపు కార్డు, ప్రభుత్వ పథకాల సమాచారం, ఏ పార్టీకి ఓటేయనున్నారనే సున్నితమైన సమాచారం ఐటీ గ్రిడ్ సంస్థ వద్ద ఉన్నట్లు గుర్తించారు. ఐటీ గ్రిడ్ సంస్థ తెదేపాకు సేవా మిత్ర అనే యాప్ను రూపొందించి... అందులో ఈ సమాచారాన్ని పొందుపర్చినట్లు ప్రాథమిక దర్యాప్తులో తేలింది. ఐటీ గ్రిడ్కు ఈ సమాచారం ఎక్కడి నుంచి వచ్చిందనే కోణంలో ఆరా తీస్తున్నారు.
వైజాగ్కు చెందిన బ్లూఫ్రాగ్ అనే సాఫ్ట్వేర్ సంస్థకు, ఐటీ గ్రిడ్కు వ్యాపార సంబంధాలున్నట్లు పోలీసులు గుర్తించారు. సంస్థ సంచాలకులు అశోక్ను అదుపులోకి తీసుకుంటే మరింత సమాచారం వస్తుందని భావిస్తున్నారు. కేసు దర్యాప్తు కోసం నాలుగు ప్రత్యేక బృందాలను ఏర్పాటు చేశారు. ఐటీ గ్రిడ్ ప్రధాన కార్యాలయాన్ని పోలీసులు అధీనంలో ఉంచుకున్నారు. సమాచారాన్ని భద్రపర్చినందుకు అమెజాన్ వెబ్ సర్వీసెస్ సంస్థకు సైబరాబాద్ పోలీసులు నోటీసులు జారీ చేశారు. మరింత సమాచారం కోసం ఆధార్ సంస్థ, ఈసీకి లేఖలు రాశారు. సీజ్ చేసిన హార్డ్డిస్క్ను ఫోరెన్సిక్ ల్యాబ్కు పంపించారు. ఐటీ గ్రిడ్ సంస్థ ఎప్పటి నుంచి కార్యకలాపాలు కొనసాగిస్తోంది. అనుబంధ సంస్థలేమైనా ఉన్నాయా అనే వివరాల కోసం రిజిస్ట్రార్ ఆఫ్ కంపెనీస్కు లేఖ రాయాలని నిర్ణయించారు పోలీసులు .
