ఫెడరల్​ ఫ్రంట్​ భవితవ్యమేంటి...?

సారు.. కారు.. పదహారు.. దిల్లీలో సర్కారు అనే నినాదంతో లోక్​సభ బరిలోకి దిగిన తెరాసకు ప్రజలు షాక్​ ఇచ్చారు. 16 స్థానాలు గెలిచి కేంద్రంలో కీలక పాత్ర పోషించాలనే లక్ష్యంతో ఉన్న ఆ పార్టీని 9 స్థానాలకే పరిమితం చేశారు. రాష్ట్రాలు తిరిగి ప్రాంతీయ పార్టీలను ఏకం చేసి సమాఖ్య కూటమి కట్టేందుకు తీవ్ర ప్రయత్నాలు చేసిన కేసీఆర్​ వ్యూహం అంతిమంగా ఫలించలేదు.

తెలంగాణ రాజకీయాల్లో తనదైన ముద్ర వేసి.. విపక్షాలను కోలుకోలేని దెబ్బతీసిన గులాబీ దళపతి కేసీఆర్​... దిల్లీ పీఠం దిశగా వేగంగా పావులు కదిపారు. ఎన్నికలకు ముందే యూపీఏ, ఎన్​డీఏకు ప్రత్యామ్నాయంగా దేశ ప్రగతి కోసం... గుణాత్మక మార్పు కోసమంటూ ఫెడరల్ ఫ్రంట్​కు తెర తీశారు. ఇప్పటి వరకు ప్రాంతీయ పార్టీల మద్దతు లేకుండా దిల్లీ కోటపై జెండా ఎగరవేసిన చరిత్ర ఏ జాతీయ పార్టీకీ లేదనే అంశాన్ని కేసీఆర్​ బలంగా వినిపించారు. ఇప్పటికీ దేశంలో విద్యుత్​, నీళ్లు లేని పల్లెలు ఉన్నాయంటే గత పాలకులైన కాంగ్రెస్​, భాజపా పాపమేనని ప్రజల్లోకి తీసుకెళ్లే ప్రయత్నం చేశారు.

కేవలం 9 స్థానాలతో సాధ్యమా...?

16 స్థానాల్లో గెలిచి దిల్లీలో కీలక పాత్ర పోషించాలన్న కేసీఆర్​ ఆశలపై తెలంగాణ ప్రజలు నీళ్లు చల్లారు. కేవలం 9 స్థానాలకే పరిమితం చేశారు. కేంద్రంలో భాజపా మ్యాజిక్​ ఫిగర్​కు సమీపంలో నిలిచిపోతుందని... కాంగ్రెస్​ గతం కంటే స్వల్పంగా మెరుగవుతుందని కేసీఆర్​ అంచనా వేశారు. అందుకోసమే దేశవ్యాప్తంగా ఉన్న ప్రాంతీయ పార్టీలతో కూడిన సమూహాన్ని ఏర్పాటు చేసే దిశగా కసరత్తు చేశారు.

తారుమారైన అంచనాలు

కాంగ్రెస్​ విషయంలో కేసీఆర్​ అంచనాలు నిజమైనప్పటికీ భాజపా విషయంలో తారుమారయ్యాయి. స్పష్టమైన ఆధిక్యతతో భాజపా మరోమారు ప్రభుత్వాన్ని నెలకొల్పబోతున్నది. ఈ పరిస్థితుల్లో కేసీఆర్​ ఊహించి... కార్యాచరణలోకి తెచ్చిన ఫెడరల్​ ఫ్రంట్​ ఆచరణ రూపం దాల్చే అవకాశాలు కనిపించడం లేదు. గుణాత్మక మార్పు నినాదానికి ఆదరణ లేదని చెప్పవచ్చు. అయినప్పటికీ ఫెడరల్​ ప్రంట్​పై ఇప్పుడు గులాబీ దళపతి వ్యూహం ఎలా ఉంటుందో చూడాలి. తనతో కలిసొచ్చే నేతలతో జాతీయ స్థాయిలో అవగాహనతో కలిసి పని చేస్తారా... లేక రాష్ట్రానికే పరిమితం అవుతారా... అనేది అందరిలో ఆసక్తిని రేకెత్తిస్తోంది.

ఇదీ చూడండి : అవకాశం అంతంతమాత్రమే... గెలుపూ అత్తెసరే...!