3.1 కోట్ల విత్ డ్రా
బ్యాంకు డెబిట్ కార్డులు క్లోనింగ్ చేస్తూ బ్యాంకులను మోసం చేస్తున్న 10మంది అంతర్రాష్ట్ర నేరగాళ్ల ముఠాను సైబరాబాద్ సైబర్ క్రైమ్ పోలీసులు పట్టుకున్నారు. ఝార్ఖండ్‌ రాష్ట్రం జామ్‌తారా జిల్లాకు చెందిన దుర్యోదన్ మండల్, సంజయ్, వీరేంద్ర, ధనుంజయ్తోపాటు మరో ఆరుగురు ముఠాగా ఏర్పడి పెద్ద ఎత్తున సైబర్ క్రైం మోసాలకు పాల్పడుతున్నారు. 12 రాష్ట్రాల్లో దాదాపు 3,500 కార్డుల ద్వారా రూ.3.1 కోట్లు విత్ డ్రా చేసినట్లు సైబరాబాద్ సీపీ సజ్జనార్ తెలిపారు. నిందితుల వద్ద ఏటీఎం కార్డు, స్వైపింగ్‌ యంత్రం, చరవాణులు స్వాధీనం చేసుకున్నారు.
నేరుగా బ్యాంకుకే
ఐసీఐసీఐ బ్యాంకు పిన్ నెంబర్లు ఇతర వివరాలు కావాలంటూ కస్టమర్ కేర్కు ఫోన్లు రావడం వల్ల అనుమానం వచ్చిన బ్యాంకు సిబ్బంది పోలీసులకు సమాచారం అందించారు. రంగంలోకి దిగిన పోలీసులు విచారణ చేపట్టగా ఈ ముఠా గుట్టురట్టయింది. జామ్‌తారా జిల్లాలోని యువత సైబర్ క్రైమ్ నేరాలనే వృత్తిగా ఎంచుకుని పెద్ద ఎత్తున మోసాలకు పాల్పడుతున్నట్లు దర్యాప్తులో బయటపడింది. నేరగాళ్లంతా 7 వ తరగతి మాత్రమే చదివినట్లు పోలీసులు గుర్తించారు. వీరిని పోలీసు కస్టడీలోకి తీసుకుని మరింత లోతుగా విచారించాలని పోలీసులు భావిస్తున్నారు. నిందితులపై పీడీచట్టం ప్రయోగించనున్నట్లు సజ్జనార్ తెలిపారు.
జాగ్రత్త
నిందితులు బ్యాంకులను లక్ష్యంగా చేసుకున్నారని, 3 లక్షల మందికి ఫోన్లు చేసి యూపీఐ ఓటీపీ సమాచారం తెలుకుని డబ్బు డ్రా చేశారన్నారు. రిజిస్టర్‌ నంబర్‌ కాక ఇతర ఫోన్‌ నంబర్లను బ్లాక్‌ చేయాలని సీపీ సూచించారు. ప్రజలు క్రెడిట్‌, డెబిట్ కార్డుల సమాచారం ఎవరికీ ఇవ్వకూడదని చెప్పారు. ఈ కామర్స్‌లో సమాచారాన్ని బయటి వ్యక్తులు దొంగిలిస్తున్నారని.. జాగ్రత్తగా ఉండాలని హెచ్చరించారు.
ఇవీ చూడండి: ఉచితంగా రీ వెరిఫికేషన్, రీ కౌంటింగ్
