ప్రాజెక్టులు ఎవరు కట్టినా సమర్థించాలనే ఉద్దేశంతోనే తాను కేసీఆర్ను అభినందించానని సంగారెడ్డి ఎమ్మెల్యే జగ్గారెడ్డి అన్నారు. గాంధీ భవన్లో ఇష్టాగోష్ఠిగా మాట్లాడారు. హరీశ్ రావు కాంగ్రెస్ మీద ఆరోపణలు చేయడం సరికాదన్నారు. 30 ఏళ్లలో కాంగ్రెస్ ఏ ప్రాజెక్ట్ కట్టలేదంటూ హరీశ్ రావు అవగాహన లేని మాటలు మాట్లాడుతున్నారని విమర్శించారు. హరీశ్ నీళ్లు తాగిన సింగూరు, మంజీరా ప్రాజెక్టులు కట్టింది కాంగ్రెస్ కాదా..? అని ప్రశ్నించారు. కల్వకుర్తి, నెట్టెంపాడు, ఎల్లంపల్లి, జూరాల, ఎస్ఎల్బీసీ, దేవాదుల ప్రాజెక్ట్లు కట్టింది కాంగ్రెస్ కాదా అని నిలదీశారు. తాము కట్టిన ప్రాజెక్ట్ల నుంచి తాగు..సాగు నీరు ప్రజలకు అందాయన్నారు. 40 ఏళ్లుగా సింగూరు, మంజీరా నీళ్లు జనం తాగుతలేరా అన్నారు.
కేసీఆర్ మెప్పుకోసమే
కేసీఆర్ మెప్పు కోసం హరీశ్ కాంగ్రెస్పై ఆరోపణలు చేస్తున్నారని మండిపడ్డారు. కాంగ్రెస్ ఏ ప్రాజెక్ట్లు కట్టిందో తెలియకపోతే తన మామ కేసీఆర్ను అడిగి తెలుసుకోవాలని సూచించారు. కాళేశ్వరం ప్రాజెక్ట్ ప్రారంభోత్సవానికి ఆహ్వానం అందలేదన్న బాధలో కాంగ్రెస్పై ఆరోపణలు చేస్తున్నారని ఎద్దేవా చేశారు. ఆరోపణలు మానుకోకుంటే సహించబోమన్నారు. కాంగ్రెస్ కట్టిన ప్రాజెక్టుల నీళ్లు తాగే పెద్దోడివి అయ్యావన్నది మర్చిపోయావా..? అని హరీశ్ను ప్రశ్నించారు.
ఇదీ చూడండి: పసిబిడ్డలపై అఘాయిత్యాలకు పాడాలి చరమగీతం
