ఝార్ఖండ్ ధన్బాద్లో ఓ యువకుడు దారుణానికి ఒడిగట్టాడు. స్నేహితులతో ఛాలెంజ్ చేసి ఓ బాలికపై అత్యాచారానికి పాల్పడ్డాడు. ఈ దారుణాన్ని వీడియో తీసి స్నేహితులకు పంపించాడు. ఈ వీడియో చివరకు బాలిక తల్లిదండ్రుల వద్దకు చేరగా.. ఘటన వెలుగులోకి వచ్చింది.
పూర్తి వివరాల్లోకి వెళ్తే..
కోయలంచల్ ధన్బాద్కు చెందిన యువకుల మధ్య ఓ మైనర్ విషయమై గొడవ జరిగింది. బాలిక తనను ప్రేమిస్తోందని స్నేహితుల్లో ఒకడు చెప్పగా.. తాను నన్నే లవ్ చేస్తోందని సంజయ్ అనే వ్యక్తి చెప్పుకొచ్చాడు. ఈ విషయమై ఇరువురి మధ్య ఘర్షణ తలెత్తింది. చివరకు.. తాను ఈ విషయాన్ని నిరూపిస్తానని సంజయ్.. తన స్నేహితులకు సవాల్ విసురుతాడు. ఆధారాలు కూడా అందిస్తానని వారితో చెబుతాడు.
స్నేహితులకు ఛాలెంజ్ చేసిన తర్వాతి రోజే.. మైనర్కు మాయమాటలు చెప్పి తనతో తీసుకెళ్లాడు. పొదల్లోకి తీసుకెళ్లి అత్యాచారానికి పాల్పడ్డాడు. ఈ ఘాతుకాన్ని ఫోన్లో రికార్డు చేశాడు. బాలికతో ప్రేమలో ఉన్నాననేందుకు ఇదే రుజువు అని వీడియోను స్నేహితులకు పంపించాడు. అయితే, సంజయ్ స్నేహితులు ఆ వీడియోను బాలిక బంధువులకు చూపించారు. దీంతో బంధువులు పోలీసులను ఆశ్రయించారు. ఫిర్యాదు నమోదు చేసుకున్న పోలీసులు.. నిందితుడు సంజయ్ను అరెస్టు చేసి జైలుకు పంపించారు.
చెన్నై డాక్టర్.. బెంగళూరులో హత్య
మరోవైపు, తమిళనాడుకు చెందిన ఓ వైద్యుడు బెంగళూరులో హత్యకు గురయ్యాడు. అతడి ప్రేయసి తన స్నేహితులతో కలిసి వైద్యుడిని అంతమొందించింది. బేగుర్ పోలీస్ స్టేషన్ పరిధిలోని న్యూ మికో లేఅవుట్ పరిధిలో ఈ ఘటన జరిగింది. మృతుడిని వికాస్గా గుర్తించారు.
పోలీసులు తెలిపిన వివరాల ప్రకారం.. వికాస్.. ఉక్రెయిన్లో వైద్య విద్య అభ్యసించాడు. చెన్నైలో వైద్యుడిగా పనిచేస్తున్నాడు. ఉన్నత విద్య కోచింగ్ కోసం వికాస్.. ఆరు నెలల క్రితం బెంగళూరుకు వచ్చాడు. ఆర్కిటెక్ట్గా పనిచేస్తున్న ప్రతిభ.. సోషల్ మీడియా ద్వారా అతడికి పరిచయమైంది. హెచ్ఎస్ఆర్ లేఅవుట్ కంపెనీలో పనిచేస్తున్న ఆమె.. వికాస్తో ప్రేమలో పడింది. వీరి ప్రేమకు ఇరు కుటుంబాలు అంగీకారం తెలిపాయి. దీంతో నవంబర్లో వివాహం చేసుకునేందుకు సిద్ధమయ్యారు.
అంతలోనే అనూహ్య ఘటన చోటు చేస్కుంది. ప్రతిభతో పాటు ఆమె తల్లి రహస్య వీడియోలను వికాస్ ఇటీవల సామాజిక మాధ్యమాల్లో ఉంచాడు. ఈ విషయమై ప్రతిభ, ఆమె కుటుంబం.. వికాస్తో గొడవ పెట్టుకుంది. ఈ క్రమంలోనే స్నేహితులతో కలిసి వికాస్‌కు బుద్ధి చెప్పాలని ప్రతిభ భావించింది. వికాస్ను కర్ణాటకలోని మికో-లేఅవుట్‌కు రమ్మని పిలిచింది. వికాస్ ఒక్కడే అక్కడికి వెళ్లాడు. అక్కడే ఉన్న ప్రతిభ.. మరో నలుగురు స్నేహితులతో కలిసి వికాస్‌పై దాడి చేసి చేయగా అతడు కుప్పకూలాడు. స్పృహ లేకుండా పడి ఉన్న వికాస్ను స్థానికులు ఆస్పత్రికి తరలించగా.. చికిత్స పొందుతూ మృతి చెందినట్లు పోలీసులు వివరించారు. ప్రతిభతో పాటు మరో ఇద్దరిని అరెస్టు చేసినట్లు పోలీసులు వెల్లడించారు. మరో నిందితుడి కోసం గాలిస్తున్నట్లు తెలిపారు.
