ఇద్దరు యువకులపై బృహత్ బెంగళూరు మహానగర పాలక సంస్థ(బీబీఎంపీ) సిబ్బంది దాడి చేశారు. కరోనా టెస్టు చేయించుకునేందుకు వారు నిరాకరించడమే ఇందుకు కారణం. టీకా కోసం వచ్చిన ఇద్దరు యువకులు చాలా సేపు లైన్లో పాడిగాపులు కాశారు. తీరా అది టీకా కేంద్రం కాదు, కొవిడ్ పరీక్షా కేంద్రం అని తెలిసే సరికి మెల్లగా అక్కడి నుంచి జారుకునేందుకు యత్నించారు.
అంత సేపు క్యూలో నిలబడి వెనక్కి వెళ్తున్న వీరిని గమనించిన బీబీఎంపీ సిబ్బంది మర్యాదగా కరోనా పరీక్ష చేయించుకోవాలని సూచించారు. వారు ససేమిరా అనడం వల్ల బలవంతంగా పరీక్ష కేంద్రం వద్దకు లాక్కెళ్లారు. టెస్ట్ చేయించుకునేందుకు యువకులు నిరాకరించడం వల్ల వారిపై దాడి చేశారు. ఇందుకు సంబంధించిన వీడియో సామాజిక మాధ్యమాల్లో వైరల్గా మారింది. యువకులపై చేయి చేసుకున్న అధికారులపై కేసు నమోదైంది.
"ఈ ఘటన నాగరత్‌పేట్ టెస్టింగ్ కేంద్రంలో జరిగింది. దీనిని మేము ఖండిస్తున్నాము. నిజానికి ఇది బాధాకరమైన విషయం. బలవంతంగా ఎవరికీ పరీక్షలు చేయించేది లేదు. ఘటనపై పూర్తి వివరాలు తెలుసుకోవడానికి విచారణకు ఆదేశిస్తున్నాం. ఇలాంటి ఘటనలు పునరావృతం కాకుండా చూసుకుంటున్నాం."
- గౌరవ్ గుప్తా, బీబీఎంపీ కమిషనర్
ఇదీ చూడండి: షాప్ తెరిచి ఉంచాడని.. చెంప చెళ్లు
