బంగాల్లో ప్రస్తుత పరిస్థితులు కశ్మీర్ కన్నా దారుణంగా ఉన్నాయని ఆ రాష్ట్ర భాజపా అధ్యక్షుడు దిలీప్ ఘోష్ ఆరోపించారు. బంగాల్ ప్రజలు భయాందోళనకు గురవుతున్నారని ఆవేదన వ్యక్తం చేశారు. నార్త్ 24 పరగణాల జిల్లాలో నిర్వహించిన ఓ కార్యక్రమానికి హాజరైన దిలీప్.. ఈ మేరకు వ్యాఖ్యానించారు.
"బంగాల్ ఉగ్రవాదులకు నిలయంగా మారింది. ఉత్తర బంగాల్లోని అయిపుర్దార్లో ఇటీవలే ఆరుగురు ఉగ్రవాదులను అరెస్టు చేశారు అధికారులు. రాష్ట్రంలో పలు టెర్రరిస్టు ముఠాలు తయారయ్యాయి. ఈ ప్రాంతంలో ఉగ్రవాదులు ఎక్కువగా ఉన్నారని ఇటీవలే బంగ్లాదేశ్ నాయకుడు ఖలేదా జియా కూడా ఆరోపించారు. ప్రస్తుతం ఈ ప్రాంతం కశ్మీర్ కన్నా దారుణంగా ఉంది".
- దిలీప్ ఘోష్, బంగాల్ భాజపా అధ్యక్షుడు.
ఎన్నికల కసరత్తు...
రానున్న బంగాల్ ఎన్నికల్లో ఏఐఎమ్ఐఎమ్ అధ్యక్షుడు అసదుద్దీన్ ఒవైసీ పోటీ చేస్తానని చేసిన వ్యాఖ్యలపై దిలీప్ స్పందించారు. ఎవరు పోటీ చేసినా తమకు ఎలాంటి నష్టం జరగదని, ప్రజలకు భాజపాపై పూర్తి విశ్వాసం ఉందని ధీమా వ్యక్తం చేశారు.
ఇదీ చదవండి:అమానుషం: క్షుద్రపూజలకు చిన్నారి బలి
