రాష్ట్రపతి ద్రౌపది ముర్ముపై తృణమూల్‌ కాంగ్రెస్‌కు చెందిన మంత్రి అఖిల్ గిరి చేసిన వ్యాఖ్యలు బంగాల్ వ్యాప్తంగా తీవ్ర దుమారం రేపాయి. ఆయన కామెంట్స్‌ వైరల్‌గా మారడతో గిరి బేషరతుగా క్షమాపణలు చెప్పారు. నందిగ్రామ్‌లో నిర్వహించిన ఓ సమావేశంలో గిరి మాట్లాడుతూ. "నేను చూడడానికి బాగుండనని భాజపా వాళ్లు విమర్శిస్తుంటారు. రూపురేఖల్ని బట్టి ఓ వ్యక్తిని అంచనా వేయలేం కదా. మనమంతా రాష్ట్రపతిని ఎంతో గౌరవిస్తాం. మరి మన రాష్ట్రపతి చూడడానికి ఎలా ఉంటారు?" అని వ్యాఖ్యానించారు.
గంటల వ్యవధిలోనే ఆయన కామెంట్స్‌ వైరల్‌గా మారిపోయాయి. మంత్రి వ్యాఖ్యలను భాజపా తీవ్రంగా విమర్శించింది. మంత్రి గిరి మాటలను బట్టి తృణమూల్‌కు గిరిజనులంటే ఎంత గౌరముందో అర్థమవుతోందని ఆరోపించింది. తృణమూల్‌ గిరిజన వ్యతిరేకి అనడానికి ఇది ప్రత్యక్ష నిదర్శనమని పేర్కొంది. తక్షణమే ఆయన్ను మంత్రి పదవి నుంచి తొలగించి, ఆరెస్టు చేయాలని డిమాండ్‌ చేసింది. అంతేకాకుండా ఈ అంశంపై జాతీయ మహిళా కమిషన్‌కు లేఖ రాసినట్లు భాజపా బంగాల్ రాష్ట్ర అధ్యక్షుడు సుకాంత మజుందార్‌ తెలిపారు. మరోవైపు మంత్రి వ్యాఖ్యలకు నిరసనగా రాష్ట్ర వ్యాప్తంగా పలుచోట్ల భాజపా నిరసన ప్రదర్శనలు నిర్వహించింది.
ఈ నేపథ్యంలో అఖిల్ గిరి మీడియాతో మాట్లాడుతూ వివరణ ఇచ్చారు. రాష్ట్రపతి ద్రౌపది ముర్మును కించపరచడం తన ఉద్దేశం కాదన్నారు. "ప్రతిసారి తనపై విమర్శలు చేస్తున్న భాజపా నాయకులను సమాధానం చెప్పే క్రమంలోనే మాట దొర్లింది. రాష్ట్రపతిని నేను అగౌరవపరిచానని ఎవరైనా అనుకుంటే అది కచ్చితంగా తప్పు. రాష్ట్రపతి అంటే నాకు అపారమైన గౌరవముంది. అలాంటి వ్యాఖ్యలు చేసినందుకు బహిరంగంగా క్షమాపణ చెబుతున్నా" అని గిరి అన్నారు.
మంత్రి బాధ్యతారాహిత్యమైన వ్యాఖ్యలపై తృణమూల్‌ కాంగ్రెస్‌ కూడా స్పందించింది. ఆ వ్యాఖ్యలు ఆయన వ్యక్తిగతమైనవని, పార్టీకి ఎలాంటి సంబంధం లేదని చెప్పుకొచ్చింది. తమ పార్టీ వ్యక్తి చేసిన వ్యాఖ్యలను తీవ్రంగా ఖండిస్తున్నట్లు ట్వీట్‌ చేసింది. పురుషులతో సమానంగా స్త్రీలు కూడా అన్ని రంగాల్లో పోటీపడుతున్న ఈ కాలంలో ఇలాంటి అసంబద్ధ వ్యాఖ్యలు సరికాదని పేర్కొంది.
