కొవిడ్-19 మహమ్మారి నుంచి కోలుకున్న వారిపై తీవ్ర ప్రభావం చూపుతోంది మ్యూకోర్మైకోసిస్(బ్లాక్ ఫంగస్). కిడ్నీ సమస్యలు ఉన్నవారు, క్యాన్సర్ బాధితులపైనా ఈ శిలీంధ్ర వ్యాధి పంజా విసురుతోంది. కొద్ది రోజులుగా బ్లాక్ ఫంగస్ బాధితుల సంఖ్య పెరుగుతుండటం ఆందోళన కలిగిస్తోంది. గుజరాత్లో మొత్తం 500 కేసులు రాగా అహ్మదాబాద్లోని ప్రభుత్వ ఆసుపత్రిలోనే 46 బ్లాక్ ఫంగస్ కేసులు బయటపడ్డాయి. గతంలో కిడ్నీ, క్యాన్సర్ బాధితులపైనే బ్లాక్ ఫంగస్ ప్రభావం ఎక్కువగా ఉండేది. ప్రస్తుతం డయాబెటిస్ రోగులు సైతం ఈ శిలీంధ్ర వ్యాధితో బాధపడుతున్నారు. అయితే.. ఈ వ్యాధికి సరైన చికిత్స తీసుకుని బయటపడొచ్చని, ఆందోళనకు గురికావొద్దని వైద్య నిపుణులు సూచిస్తున్నారు.
అసలు ఈ వ్యాధికి కారణాలేంటి? నిపుణుల మాటేంటి?
ఆక్సిజన్ అందించేప్పుడు స్టెరైల్(శుభ్రమైన) నీటికి బదులుగా సాధారణ నీటని హ్యుమిడిఫయర్ (తేమ అందించే పరికరం)లో ఉపయోగించటం కూడా మ్యూకోర్మైకోసిస్కు ప్రధాన కారణంగా చెబుతున్నారు నిపుణులు. ఈ అంశంపై ఈటీవీ భారత్కు కీలక విషయాలు వివరించారు అహ్మదాబాద్కు చెందిన సీనియర్ హృద్రోగ చికిత్స నిపుణులు డాక్టర్ అతుల్ అభ్యంకర్.
" ఈ వ్యాధి వ్యాప్తికి కారణాల్లో ప్రధానమైనవి ఆక్సిజన్కు ఉపయోగించే హ్యుమిడిఫయర్లే. వాటిల్లో స్టెరైల్(శుభ్రమైన) నీటినే ఉపయోగించాలి. కానీ, ప్రైవేటు ఆసుపత్రులు, కొవిడ్ ఐసోలేషన్ కేంద్రాలు, ఇళ్లల్లో కరోనా రోగులకు ఆక్సిజన్ ఇచ్చేటప్పుడు హ్యుమిడిఫయర్లో నల్లా నీటిని వాడుతున్నారు. అందులో చాలా రకాల సుక్ష్మ జీవులు ఉంటాయి. వాటి కారణంగా శరీరంలో ఫంగస్ ఏర్పడుతుంది. హ్యుమిడిఫయర్లో తప్పకుండా స్టెరైల్ నీటినే వినియోగించాలి. 24 గంటల్లో రెండు సార్లు నీటని మార్చాలి. ఎప్పటికప్పుడు హ్యుమిడిఫయర్ను శుభ్రం చేయాలి. "
- డాక్టర్ అతుల్ అభ్యంకర్, సీనియర్ హృద్రోగ చికిత్స నిపుణులు
స్టెరాయిడ్ల దుష్ప్రభావాలతోనూ..
మ్యూకోర్మైకోసిస్ అనేది చాలా అరుదైన వ్యాధి. కానీ, తీవ్రమైనది, ఇది ప్రతిచోటా జీవులలో కనిపిస్తుంది. బురద నేలల్లో ఎక్కువగా వృద్ధి చెందుతుంది. మ్యూకోర్మైకోసిస్ ఫంగస్.. శ్వాస, గాయాల నుంచి మానవ శరీరంలోకి ప్రవేశిస్తుంది. కొవిడ్-19 చికిత్సలో రెమ్డెసివిర్, టొసిలిజుమాబ్ ఇంజక్షన్లు కొరత కారణంగా రోగులకు ఎక్కువగా స్టెరాయిడ్స్ ఇస్తున్నారు. వాటి దుష్ప్రభావాల కారణంగా మ్యూకోర్మైకోసిస్ దాడి చేస్తోంది. కళ్లు, ముక్కు, మెదడు, పళ్లపై ప్రభావం చూపుతోంది.
అలా చేయటం ప్రమాదకరం!
మరోవైపు.. గుజరాత్లో కరోనా బారిన పడిన వారు ఆవు పేడ, ఆవు మూత్రాన్ని శరీరంపై రాస్తున్నారు. దాని ద్వారా రోగనిరోధక శక్తి పెరిగి కొవిడ్-19 నుంచి కోలుకునేందుకు సాయపడుతుందని భావిస్తున్నారు. దీనిపై దేశీయంగా పరిశోధన చేపట్టిన వైద్యులు హెచ్చరిస్తున్నారు. ఆవు పేడను శరీరంపై పూసుకోవటం ద్వారా కొవిడ్కు రక్షణ కల్పించదని స్పష్టం చేశారు. దాని ద్వారా మ్యుకోర్మైకోసిస్ వంటి ఫంగస్ ఇన్ఫెక్షన్లు వచ్చే ప్రమాదం ఉందని హెచ్చరించారు.
ఇదీ చూడండి: 'మహా'లో బ్లాక్ ఫంగస్ పంజా.. 52 మంది మృతి!
