సీఎం పిల్లల కిడ్నాప్​కు కుట్ర.. రాజకీయాల్లో సంచలనం!

తన పిల్లలను కిడ్నాప్​ చేసేందుకు కేపీసీసీ అధ్యక్షుడు సుధాకరన్​ గతంలో కుట్ర పన్నారని కేరళ ముఖ్యమంత్రి పినరయి విజయన్ ఆరోపించారు. ఇంతవరకు ఈ విషయాన్ని తాను ఎవరితోనూ చెప్పలేదని తెలిపారు. అయితే.. సీఎం వ్యాఖ్యలపై స్పందించిన సుధాకరన్​.. అందులో నిజముంటే నిరూపించాలని సవాలు విసిరారు.

కేరళ ముఖ్యమంత్రి పినరయి విజయన్​.. ఆ రాష్ట్ర కాంగ్రెస్​ కమిటీ(కేపీసీసీ) అధ్యక్షుడు కె.సుధాకరన్​ మధ్య వాగ్వాదం ముదురుతోంది. కొన్నేళ్ల క్రితం సుధాకరన్​ తన పిల్లలను కిడ్నాప్ చేయాలని యత్నించారని పినరయి విజయన్ శుక్రవారం ఆరోపించారు.

"చాలా సంవత్సరాల క్రితం ఓ రోజు ఉదయం సుధాకరన్​కు స్నేహితుడైన ఓ వ్యక్తి మా ఇంటికి వచ్చాడు. పాఠశాలల్లో చదువుకునే నా పిల్లలను కిడ్నాప్​ చేయాలని తనకు సుధాకరన్​ చెప్పారని అతను నాతో అన్నాడు. నేను ఆ వ్యక్తి పేరును ఇప్పుడు చెప్పదలుచుకోలేదు. ఇప్పటివరకు ఈ విషయాన్ని నా భార్య సహా ఎవరితోనూ చెప్పలేదు. ఇలాంటివి వింటే ఆమె భయపడిపోతుంది... అందుకే చెప్పలేదు."

- పినరయి విజయన్​, కేరళ ముఖ్యమంత్రి

అయితే, దీనిపై స్పందించిన సుధాకరన్​.. ఈ ఆరోపణలను నిరూపించాలని విజయన్​కు సవాలు విసిరారు. ఇందులో నిజం ఉంటే అప్పుడే పోలీసులను ఎందుకు ఆశ్రయించలేదని ప్రశ్నించారు. ఈ మేరకు ఆదివారం కొచ్చిలో నిర్వహించిన విలేకరుల సమావేశంలో ఆయన మాట్లాడారు.

"నా స్నేహితుడు ఒకరు తన వద్దకు వచ్చి, ఆయన పిల్లలను కిడ్నాప్ చేయాలని చెప్పారని ముఖ్యమంత్రి చెబుతున్నారు. కానీ, ఆ వచ్చిన వ్యక్తి ఎవరో, అతని పేరు ఏమిటో ఎందుకు చెప్పటం లేదు. సీఎం పదవిలో ఉన్న ఓ వ్యక్తి ఇలాంటి ఆరోపణలు చేయటం ఎంత మాత్రం తగదు."

- సుధాకరన్​, కేపీసీసీ అధ్యక్షుడు

అయితే.. విజయన్​కు చెందిన కొన్ని మీడియా సంస్థలు తనను గూండాలా చిత్రీకరించాలని యత్నిస్తున్నాయని సుధాకరన్ ఆరోపించారు. అందుకే తాను ఆఫ్​ ద రికార్డు మాట్లాడినవి కూడా ప్రచురిస్తున్నాయని ధ్వజమెత్తారు. ఇలాంటి వాటి వల్ల ఏమీ కాదని.. ప్రజలకు, కాంగ్రెస్​ కార్యకర్తలకు అన్నీ తెలుసని వ్యాఖ్యానించారు.

అసలెక్కడ మొదలైందంటే...

కన్నూర్​ రాజకీయ ప్రత్యర్థులైన ముఖ్యమంత్రి విజయన్​కు, కె.సుధాకరన్​ మధ్య వాగ్వాదం.. ఓ మీడియాకు సుధాకరన్​ ఇచ్చిన ఇంటర్యూతో ప్రారంభమైంది. తాను తాలస్సెరీ బ్రెన్నెన్​ కళాశాలలో చదువుతున్నప్పుడు విజయన్​ను కొట్టానని సుధాకరన్​ ఆ ఇంటర్వ్యూలో చెప్పారు.

దీనిపై శుక్రవారం స్పందించిన ముఖ్యమంత్రి విజయన్​... అది సుధాకరన్​ ఊహేనని కొట్టిపారేశారు. కేరళ స్టూడెంట్ యూనియన్​, కేరళ స్టూడెంట్​ ఫెడరేషన్​కు మధ్య జరిగిన ఘర్షణల్లో... సుధాకరన్​ను కేఎస్​ఎఫ్​ విద్యార్థులు అర్ధనగ్నంగా నడిపించారని ఆయన ఆరోపించారు. "నిజానికి ఇలాంటివి చెప్పాలని నాకు ఎంత మాత్రం అనిపించదు. కానీ, ఎవరైనా తప్పుడు విషయాలు మాట్లాడితే.. ఇలాంటి నిజాలను బయటపెట్టక తప్పదు" అని విజయన్ అన్నారు.

ఇదీ చూడండి: వ్యాక్సినేషన్​పై కేరళ ప్రభుత్వానికి పీటీ ఉష విన్నపం

ఇదీ చూడండి: Kerala Gold Smuggling: కీలక నిందితుడు అరెస్ట్​