దేశవ్యాప్తంగా కరోనా వ్యాక్సినేషన్ రెండో దశ ప్రారంభమైంది. వృద్ధులు, ఇతర దీర్ఘకాలిక వ్యాధులు ఉన్న 45 ఏళ్లకు పైబడిన వ్యక్తులకు ఈ దశలో టీకా పొందే అవకాశం ఉంది. ఆన్లైన్తో పాటు వ్యాక్సిన్ కేంద్రం వద్ద నేరుగా టీకా కోసం నమోదు చేసుకునే వెసులుబాటును కేంద్రం కల్పించింది. టీకా కేంద్రానికి దారి తెలియక ఇబ్బంది పడాల్సిన పని లేదు. కొవిన్ 2.0 పోర్టల్ను జీపీఎస్కు అనుసంధానించారు. టీకా పొందాలనుకున్న తేదీ, సమయం, పంపిణీ కేంద్రాన్ని ఎంపిక చేసుకుంటే.. పంపిణీ కేంద్రానికి దారి చూపిస్తుంది.
ప్రభుత్వం ద్వారా అందించే వ్యాక్సినేషన్ కేంద్రాల్లో టీకాను ఉచితంగా వేస్తారని కేంద్రం స్పష్టం చేసింది. ప్రైవేటు కేంద్రాల్లో టీకా ఖరీదు రూ.250 ఉంటుందని తెలిపింది.
పోర్టల్లో మాత్రమే
టీకా రిజిస్ట్రేషన్ కొవిన్ పోర్టల్, ఆరోగ్య సేతు యాప్ ద్వారా మాత్రమే అందుబాటులో ఉంటుంది. కొవిన్ 2.0 మొబైల్ యాప్ ద్వారా టీకా కోసం నమోదు చేసుకునే అవకాశం లేదు.
కొవిన్‌లో పేరు నమోదు ప్రక్రియ ఎలాగంటే..
- www.cowin.gov.in లో పేరు నమోదు చేసుకోవచ్చు.
- కొవిన్ వెబ్‌సైట్‌లోకి వెళ్లిన తర్వాత అందులో Register Yourself అనే బటన్‌ ఉంటుంది. దాన్ని క్లిక్‌ చేసి మొబైల్ నంబరు రాస్తే మన ఫోన్‌కు ఒక ఓటీపీ వస్తుంది.
- ఆ ఓటీపీని ఎంటర్‌ చేస్తే రిజిస్ట్రేషన్ పేజీకి వెళ్తుంది. అక్కడ మీ పేరు, వయసు, పుట్టినతేదీ వంటి వివరాలు ఎంటర్‌ చేయాలి. దీంతో పాటు ఏదో ఒక ధ్రువీకరణ పత్రం (డ్రైవింగ్‌ లైసెన్స్‌, పాన్‌కార్డు, ఓటరు కార్డు, ఆధార్‌ కార్డు, పాస్‌పోర్టు తదితర)ఎంచుకుని దాన్ని అప్‌లోడ్‌ చేయాల్సి ఉంటుంది.
- ఆ తర్వాత మీకు దీర్ఘకాల వ్యాధులు ఉన్నాయో లేదో అని అడుగుంది. 45 నుంచి 60ఏళ్ల లోపు వారైతే వ్యాధిని నిర్ధారించే డాక్టర్‌ సర్టిఫికేట్‌ను అప్‌లోడ్‌ చేయాల్సి ఉంటుంది.
- ఇలా అన్ని వివరాలు నింపిన తర్వాత రిజిస్టర్‌ బటన్‌పైన క్లిక్‌ చేయాలి.
- రిజిస్ట్రేషన్ పూర్తయిన తర్వాత మీ అకౌంట్‌ వివరాలను చూపిస్తుంది. ఆ తర్వాత కుటుంబసభ్యుల వివరాలు కూడా యాడ్‌ చేసుకోవచ్చు.
- ఒక వ్యక్తి ఒక మొబైల్ నంబరు మీద గరిష్ఠంగా ముగ్గురు వ్యక్తులను యాడ్‌ చేసుకోవచ్చు. ఇందుకోసం ‘యాడ్‌ మోర్‌’ బటన్‌ను క్లిక్‌ చేయాలి.
- ఆ తర్వాత టీకా కోసం అపాయింట్‌మెంట్‌ బుక్‌ చేసుకోవాలి. 'Schedule appointment' అని బటన్‌ క్లిక్‌ చేస్తే అపాయింట్‌మెంట్‌ పేజీకి వెళ్తుంది. అక్కడ మన రాష్ట్రం, జిల్లా, పిన్‌కోడ్‌ ఎంటర్‌ చేసి మనకు సమీపంలోని టీకా పంపిణీ కేంద్రాలను తెలుసుకోవచ్చు. ఆ జాబితా నుంచి ఒక కేంద్రాన్ని ఎంచుకుంటే అందుబాటులో ఉన్న స్లాట్స్‌ చూపిస్తుంది. వాటిలో నుంచి సమయం, తేదీని ఎంచుకుని కింద ఉండే Book బటన్‌ను క్లిక్‌ చేస్తే అపాయింట్‌మెంట్‌ లభిస్తుంది.
- అవసరమైతే టీకా తేదీ, సమయాన్ని మార్చుకునే వెసులుబాటు కూడా ఉంటుంది. అయితే, దీన్ని అపాయింట్‌మెంట్‌ తీసుకున్న తేదీ కంటే ముందే మార్చుకోవాలి. సిటిజన్‌ రిజిస్ట్రేషన్‌లో లాగిన్‌ అయితే రీషెడ్యూల్‌ ఆప్షన్‌ కన్పిస్తుంది.
మరిన్ని వివరాలు..
- టీకా కేంద్రాల్లో ఉదయం 9 నుంచి మధ్యాహ్నం 3 గంటల వరకు వ్యాక్సిన్ ఇస్తారు.
- తొలి డోసు తీసుకున్న 28 రోజుల తర్వాత రెండో డోసు తీసుకోవాలి. మొదటి డోసు తీసుకున్నప్పుడే రెండో డోసు ఎప్పుడు తీసుకోవాలో తెలుస్తుంది.
- రెండో డోసు తీసుకోవడం ద్వారా కొవిడ్ టీకా పొందినట్లుగా ధ్రువపత్రాన్ని డౌన్‌లోడ్‌ చేసుకోవడానికి అవకాశం లభిస్తుంది.
- టీకా పొందేప్పుడు నమోదు సమయంలో అప్‌లోడ్‌ చేసిన సంబంధిత ధ్రువపత్రాల ఒరిజినల్స్‌ను వెంట తీసుకెళ్లాలి.
ఇదీ చదవండి: జోరుగా కొవిడ్ వ్యాక్సినేషన్
