ఉత్తర్ప్రదేశ్ రాయ్బరేలీకి చెందిన ఓ మహిళకు ఇన్స్టాగ్రామ్లో ఓ వ్యక్తితో పరిచయం ఏర్పడింది. ఆ వ్యక్తి తనని తాను బ్రిటన్ నివాసితుడిగా పరిచయం చేసుకున్నాడు. కొన్ని రోజుల స్నేహం తర్వాత.. బ్రిటన్ నుంచి ఓ విలువైన కానుక, కొంత నగదు పంపుతానని ఆ మహిళను నమ్మించాడు.
కొన్ని రోజుల తర్వాత మరో మహిళ నుంచి ఆ రాయ్బరేలీ వాసికి వాట్సాప్ ఫోన్ వచ్చింది. 'మీ కోసం దిల్లీలో విలువైన కానుక, బ్రిటన్ కరెన్సీలో రూ. 45లక్షలు వేచిచూస్తున్నాయి. వాటిని మీరు తీసుకోవాలంటే కొంత డబ్బు చెల్లించాలి. ఇన్స్టాల్మెంట్లోనైనా చెల్లించవచ్చు,' అని చెప్పింది. అది నమ్మిన ఆ మహిళ.. అలా రూ. 32లక్షలు చెల్లించింది. ఆ తర్వాత ఆ వ్యక్తి, మహిళతో ఆమెకు సంబంధం తెగిపోయింది. ఆ నెంబర్లకు ఎన్నిసార్లు కాల్ చేసినా ఎవరూ స్పందించలేదు.
ఇక ఆమె స్వయంగా దిల్లీకి వెళ్లి 'కానుక' గురించి వాకబు చేసింది. చివరికి తాను మోసపోయినట్టు అర్థం చేసుకుంది. రాయ్బరేలీకి తిరిగివెళ్లి, పోలీసులను ఆశ్రయించింది. ఘటనపై పోలీసులు దర్యాప్తు ముమ్మరం చేశారు.
'ఇలా చేయకండి..'
ఆన్లైన్ ఆఫర్ల వలల్లో చిక్కుకోవద్దు అని ప్రజలకు పోలీసులు విజ్ఞప్తి చేశారు. నగదుకు సంబంధించిన విషయంలో ఎవరితో లావాదేవీలు జరుపుతున్నారో స్పష్టంగా తెలుసుకోవాలని తెలిపారు. సైబర్ నేరగాళ్ల మోసాలు పెరిగిపోతున్నాయని, నిత్యం జాగ్రత్తగా ఉండాలని హెచ్చరించారు.
ఆన్లైన్ మోసాల ఫిర్యాదుల కోసం 155260 అనే హెల్ప్లైన్ను ఈ ఏడాది మే నెలలో ప్రవేశపెట్టింది ఉత్తర్ప్రదేశ్ ప్రభుత్వం. సెప్టెంబర్ నాటికి రాష్ట్రప్రజలు మోసపోయిన దాదాపు రూ. 2కోట్లు పోలీసులు తిరిగి తీసుకొచ్చారు. మరో ఐదు కోట్లకు చెందిన లావాదేవీలను జప్తు చేశారు. ఆన్లైన్ మోసాలపై ఎంత త్వరగా ఫిర్యాదు చేస్తే, పోగొట్టుకున్న డబ్బును అంత త్వరగా వెనక్కి తీసుకునే అవకాశముందని చెబుతున్నారు పోలీసులు.
ఇవీ చూడండి:-
