UP polls 2022: ఉత్తర్ప్రదేశ్ అసెంబ్లీ ఎన్నికల సమయం దగ్గర పడుతున్న క్రమంలో రాజకీయాలు రసవత్తరంగా సాగుతున్నాయి. ఎన్నికల్లో పోటీ చేసేందుకు టికెట్ దక్కని వారే కాదు.. కొందరు టికెట్ దక్కినా పార్టీ మారుతున్న సందర్భాలు ఆశ్చర్యపరుస్తున్నాయి. అలాంటి ఆసక్తికర సంఘటనే కాంగ్రెస్, ఎన్డీఏ మధ్య జరిగింది. రెండు వారాల క్రితమే రామ్పుర్ జిల్లాలోని సువార్ అసెంబ్లీ నియోజకర్గం టికెట్ను హైదర్ అలీ ఖాన్కు కేటాయించింది కాంగ్రెస్. ఇప్పుడు అదే అభ్యర్థిని అదే నియోజకవర్గం నుంచి పోటీలో నిలుపుతున్నట్లు భాజపా మిత్రపక్షం అప్నాదళ్(సోనెలాల్) ప్రకటించటం అందరినీ ఆశ్చర్యానికి గురిచేసింది.
టికెట్ దక్కినప్పటికీ హస్తం పార్టీకి స్వస్తి చెప్పిన హైదర్ అలీ ఖాన్ అప్నాదళ్లో చేరారు. దీంతో 2014 తర్వాత ఎన్డీఏ తరఫున బరిలో దిగుతున్న తొలి ముస్లిం అభ్యర్థిగా నిలిచారు. కాంగ్రెస్ టికెట్పై పోటీ చేసినా గెలిచే అవకాశాలు తక్కువగానే ఉన్నాయని, అందుకే పార్టీ మారుతున్నట్లు చెప్పుకొచ్చారు.
" అప్నాదళ్(ఎస్)లో చేరాను. ఇప్పుడు నా నియోజకవర్గం అభివృద్ధికి భరోసా ఇవ్వగలను. నా పార్టీ నేత అనుప్రియా పటేల్ పోరాటమే నాకు స్ఫూర్తి. గడిచిన ఐదేళ్లలో యూపీ ప్రభుత్వం ఎన్నో చేసింది. ఈ నిర్ణయం తీసుకునేందుకు చాలా అంశాలు నన్ను ప్రభావితం చేశాయి. "
- హైదర్ అలీ ఖాన్.
కాంగ్రెస్లోనే ఖాన్ తండ్రి..
హైదర్ అలీ ఖాన్ తండ్రి నవాబ్ కాజిబ్ అలీ ఖాన్ ప్రస్తుతం కాంగ్రెస్లోనే కొనసాగుతున్నారు. రామ్పుర్ స్థానం నుంచి అసెంబ్లీ ఎన్నికల బరిలో నిలుస్తున్నారు. దీంతో కాంగ్రెస్, ఎన్డీఏ మధ్య పోటీ ఆసక్తికరంగా మారనుందని రాజకీయ విశ్లేషకులు భావిస్తున్నారు.
కుమారుడు పార్టీ మారడంపై విలేకరులు ప్రశ్నించగా.. 'రామ్పుర్ అసెంబ్లీ నియోజకవర్గంలో కాంగ్రెస్ అభ్యర్థిని నేనే. పార్టీని వీడాలనే ఆలోచనే లేదు.' అని పేర్కొన్నారు హైదర్ అలీ ఖాన్ తండ్రి నవాబ్ కజిమ్ అలీ ఖాన్.
అభ్యర్థుల జాబితా ప్రకటించి.. టికెట్ ఖరారు చేసిన తర్వాత కాంగ్రెస్ను వీడిన వారిలో హైదర్ అలీ ఖాన్ రెండో వ్యక్తి. ఆయన కన్నా ముందే బరేలీ కంటోన్మెట్ అభ్యర్థి సుప్రియా అరోన్ కాంగ్రెస్ను వీడి సమాజ్వాదీ పార్టీలో చేరారు.
అప్నాదళ్(ఎస్) కీలక ప్రకటన..
సువార్ అసెంబ్లీ స్థానం నుంచే హైదర్ అలీ ఖాన్ను బరిలో దింపుతున్నట్లు ప్రకటించారు అప్నాదళ్(ఎస్) జాతీయ అధికార ప్రతినిధి రాజేశ్ పటేల్.
" పార్టీ నాయకత్వాన్ని మెప్పించిన హైదర్ అలీ ఖాన్.. కొద్ది రోజుల క్రితమే దిల్లీలో పార్టీ సభ్యత్వాన్ని తీసుకున్నారు. అయితే.. సువార్ నియోజకవర్గ అభ్యర్థిగా హైదర్ను ప్రకటించింది కాంగ్రెస్. అప్నాదళ్(ఎస్)లో చేరిన క్రమంలో అదే స్థానంలో హైదర్ను పోటీలో నిలబెడుతున్నాం. "
- రాజేశ్ పటేల్, అప్నాదళ్(ఎస్), జాతీయ అధికార ప్రతినిధి.
2017లో జరిగిన అసెంబ్లీ ఎన్నికల్లో సమాజ్వాదీ పార్టీ సీనియర్ నేత, రామ్పుర్ ఎంపీ అజామ్ ఖాన్ కుమారుడు అబ్దుల్లా అజామ్ ఖాన్ పోటీ చేసి గెలుపొందారు.
సంబంధం కోసం వెతుకుతున్నారా? తెలుగు మాట్రిమోని లో రిజిస్ట్రేషన్ ఉచితం!
ఇదీ చూడండి: కాంగ్రెస్కు నేతల మొండిచెయ్యి.. టికెట్ ఇచ్చినా పార్టీ నుంచి జంప్!
