మైనర్ వివాహితపై ఐదుగురు దుండగులు అత్యాచారం చేసిన ఘటన రాజస్థాన్లోని అల్వార్లో జరిగింది. ఈ ఘటన జూన్ 12న జరగగా ఆలస్యంగా వెలుగులోకి వచ్చింది. రామగఢ్ పోలీస్ స్టేషన్ పరిధిలోని ఓ గ్రామంలో జూన్ 12 రాత్రి ఇంటి మిద్దెపై పడుకునేందుకు భార్యాభర్తలు ఇద్దరు వెళ్లారు. ఈ క్రమంలోనే పక్క డాబా పైన నిద్రిస్తున్న ఐదుగురు యువకులు అర్ధరాత్రి కత్తితో బెదిరించి.. ఆమెపై అత్యాచారం చేశారు. వారి కదలికలతో భర్తకు మెలుకువ రావటం వల్ల నిందితులు గోడ దూకి పారిపోయారు. దీనిపై కేసు నమోదు చేసిన పోలీసులు.. వైద్య పరీక్షలు నిర్వహించి దర్యాప్తు చేపట్టారు.
పదేళ్ల బాలికపై గ్యాంగ్రేప్: ఉత్తర్ప్రదేశ్ బిసల్పుర్లో దారుణం జరిగింది. పదేళ్ల బాలికపై ముగ్గరు వ్యక్తులు కలిసి గ్యాంగ్ రేప్ చేశారు. ఈ ఘటన మే 15న జరగగా ఆలస్యంగా వెలుగులోకి వచ్చింది. బాలిక తన ఇంటి ముందు ఆడుకుంటుండగా.. ఖుర్జాల్, జితేంద్ర, వీరేంద్ర అనే ముగ్గురు నిందితులు పొలాల్లోకి ఎత్తుకెళ్లారు. ఆమెపై అత్యాచారం చేసి అక్కడే వదిలేసి వెళ్లిపోయారు. తర్వాత గ్రామస్థులు గమనించి కుటుంబ సభ్యులకు సమాచారం అందించారు. మొదట కేసు పెట్టేందుకు ప్రయత్నించగా పోలీసులు పట్టించుకోలేదని బాలిక తల్లి వాపోయింది. అనంతరం కేసు నమోదు చేసుకున్న పోలీసులు.. దర్యాప్తు చేపట్టారు.
ఫ్యాషన్ డిజైనర్పై అత్యాచారం: ఓ ఫ్యాషన్ డిజైనర్ను రేప్ చేసిన ఘటన రాజస్థాన్ రాజధాని జైపుర్లో జరిగింది. బాధితురాలి ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేపట్టారు. ఉత్తర్ప్రదేశ్ బరేలీ జిల్లాకు చెందిన బాధితురాలు.. 2019 నుంచి జైపుర్లో నివసిస్తోంది. ఆమె ఫ్యాషన్ డిజైనర్గా పనిచేస్తుండగా.. బట్టల దుకాణం నిర్వహించే జిశాన్ ఖాన్ పరిచయం అయ్యాడు. వ్యాపారంలో సాయం చేస్తానంటూ బాధితురాలిని నమ్మించి ఆమెకు దగ్గరయ్యాడు. ఆపై అనేక సార్లు హోటళ్లలో ఆమెతో లైంగిక సంబంధాలు పెట్టుకున్నాడు.
ఈ క్రమంలోనే బాధితురాలు పెళ్లి చేసుకోమని కోరగా.. అతడు నిరాకరించాడు. పెళ్లికి బాధితురాలు పట్టుపట్టడం వల్ల ముంబయి వెళ్లిన నిందితుడు.. అక్కడ మరో అమ్మాయిని వివాహం చేసుకున్నాడు. దీంతో బాధితురాలు.. జిషాన్ ఖాన్కు ఫోన్ చేయగా.. ఈ విషయం బయటపెడితే చంపేస్తానంటూ బెదిరించాడు. దీంతో నిందితుడిపై అత్యాచార సెక్షన్ల కింద కేసు పెట్టింది బాధితురాలు. కేసు నమోదు చేసుకున్న పోలీసులు.. నిందితుడు కోసం గాలిస్తున్నారు.
ఇదీ చదవండి: స్కూటీతో సహా మ్యాన్హోల్లో పడిపోయిన దంపతులు.. క్షణాల్లో..!
