UP assembly elections: ఉత్తర్ప్రదేశ్ అసెంబ్లీ ఎన్నికలు దగ్గరపడుతున్న క్రమంలో పోటీలో నిలిచే అభ్యర్థులను ప్రకటిస్తున్నాయి పార్టీలు. తాజాగా 159 మందితో కూడిన జాబితాను విడుదల చేసింది సమాజ్వాదీ పార్టీ. ఎస్పీ అధినేత, మాజీ ముఖ్యమంత్రి అఖిలేశ్ యాదవ్.. మెయిన్పురి జిల్లాలోని కర్హాల్ నియోజకవర్గం నుంచి బరిలో దిగుతున్నారు. అలాగే.. జైలుకు వెళ్లిన నేత అజామ్ ఖాన్ రామ్పుర్ నుంచి, పార్టీ ఎమ్మెల్యే నహిద్ హసన్ కైరాన్ నుంచి పోటీ చేస్తున్నారు.
ఇటీవల సమాజ్వాదీలో చేరిన రాష్ట్ర మాజీ మంత్రి ధరమ్ సింగ్ సైనీకి సహరాన్పుర్ జిల్లాలోని సకుర్ నియోజకవర్గాన్ని కేటాయించారు అఖిలేశ్. అజామ్ ఖాన్ కుమారుడు అబ్దుల్లా అజామ్కు సువార్ తాండా టికెట్ ఇచ్చారు. పార్టీ సీనియర్ నేత శివపాల్ యాదవ్కు తమ కుటుంబానికి కంచుకోటగా ఉన్న ఇతవాహ్ జిల్లాలోని జశ్వంత్నగర్ అసెంబ్లీ స్థానాన్ని కేటాయించారు.
ఎస్పీలోకి భాజపా ఉపాధ్యక్షుడి భార్య..
ఉత్తర్ప్రదేశ్ భాజపా ఉపాధ్యక్షుడిగా సేవలందించి 20 నెలల క్రితం మృతి చెందిన ఉపేంద్ర దత్ శుక్లా భార్య శుభావతి శుక్లా సమాజ్వాదీ పార్టీలో చేరారు. ఆమెతో పాటు ఇద్దరు కుమారులు సైతం ఎస్పీలో చేరారు. ఈ సందర్భంగా ముఖ్యమంత్రి యోగి ఆదిత్యనాథ్పై విమర్శలు చేసింది శుక్లా కుటుంబం. శుక్లా మరణించి 20 నెలలు గడుస్తున్నా కనీసం ఎలా ఉన్నారని కూడా అడగలేదని ఆవేదన వ్యక్తం చేశారు శుభావతి. భాజపా నుంచి ఏ ఒక్కరు తమను కలిసేందుకు రాలేదన్నారు. ఆ సమయంలో సమాజ్వాదీ పార్టీ అధినేత అఖిలేశ్ యాదవ్ అండగా నిలిచారని కృతజ్ఞతలు తెలిపారు.
ఉత్తర్ప్రదేశ్ అసెంబ్లీలోని 403 నియోజకవర్గాలకు ఎన్నికలు ఫిబ్రవరి 10 నుంచి మార్చి 7 వరకు ఏడు దశల్లో జరగనున్నాయి. మార్చి 10 ఓట్ల లెక్కింపు, ఫలితాల ప్రకటన ఉంటుంది.
ఉత్తరాఖండ్లో కాంగ్రెస్ రెండో జాబితా..
Uttarakhand assembly election 2022: ఉత్తర్ప్రదేశ్ అసెంబ్లీ ఎన్నికల్లో పోటీ చేసే 11 మంది అభ్యర్థులతో కూడిన రెండో జాబితాను విడుదల చేసింది కాంగ్రెస్. రాష్ట్ర మాజీ ముఖ్యమంత్రి హరీశ్ రావత్కు ఈ జాబితాలో చోటు కల్పించింది. ఆయన రామ్నగర్ అసెంబ్లీ నియోజకవర్గం నుంచి ఎన్నికల్లో పోటీ చేస్తున్నారు. అలాగే.. ఇటీవలే భాజపా నుంచి కాంగ్రెస్లోకి తిరిగి వచ్చిన హారక్ సింగ్ రావత్ కోడలు.. అణుకృతి గుసేన్ రావత్కు లాన్స్డౌన్ సీటు కేటాయించింది. అయితే.. హారక్ సింగ్కు సీటు కేటాయించలేదు. మరో ఆరు స్థానాలకు అభ్యర్థులను ఖరారు చేయలేదు. అందులో హారక్ సింగ్కు చోటు కల్పించే అవకాశం ఉన్నట్లు తెలుస్తోంది. తాజా జాబితాతో మొత్తం 64 మంది పేర్లను ఖరారు చేసింది.
సంబంధం కోసం వెతుకుతున్నారా? తెలుగు మాట్రిమోని లో రిజిస్ట్రేషన్ ఉచితం!
ఇదీ చూడండి: కాంగ్రెస్లో తండ్రి.. ప్రత్యర్థి పార్టీలోకి కుమారుడు.. ఎన్డీఏ తొలి ముస్లిం అభ్యర్థిగా రికార్డ్!
