దేశవ్యాప్తంగా కరోనా 2.0 విజృంభిస్తోంది. ప్రాణాంతకమైన ఈ వైరస్ విస్తరించకుండా ఉండటానికి మాస్క్, శానిటైజర్, భౌతిక దూరం పాటించడం ఎంత అవసరమో ఈ రెండో దశ కరోనా వ్యాప్తి చెబుతోంది.
కానీ ఇన్ని జాగ్రత్తలు తీసుకుంటున్నప్పటికీ ప్రజలు వైరస్ బారిన పడుతూనే ఉన్నారు. దీనిని దృష్టిలో పెట్టుకుని బిహార్కు చెందిన ఇద్దరు విద్యార్థులు ఒక గ్యాడ్జెట్ను తయారు చేశారు. ఒక వ్యక్తికి కరోనా లక్షణాలు ఉంటే ఆ గ్యాడ్జెట్ అతడిని మీటర్ దూరంలోనే గుర్తిస్తుంది. వెంటనే అందులోని అలారం మోగుతుంది. ఫలితంగా.. కరోనా లక్షణాలున్న ఆ వ్యక్తికి దూరంగా ఉండవచ్చు.
ఈ కరోనా అలర్ట్ డివైజ్ని పాట్నాకిల్కారీకి చెందిన 10, 12వ తరగతి చదువుతున్న ఇద్దరు విద్యార్థులు అర్పిత్, అభిజీత్ తయారు చేశారు.
మీటరు దూరం నుంచే ఓ వ్యక్తి శరీరంలో ఉన్న ఉష్ణోగ్రతను ఈ 'కరోనా అలర్ట్ డివైజ్'లో ఉండే సెన్సార్లు గుర్తిస్తాయి. ఈ డివైజ్ చిన్నగా ఉంటుంది. షర్ట్ జేబులో దీన్ని పెట్టుకోగలము. వ్యక్తి దగ్గినా, తుమ్మినా లేదా శరీర ఉష్ణోగ్రత ఎక్కువగా ఉన్నా ఈ డివైజ్ యాక్టివ్ అయ్యి.. అలారాన్ని మోగిస్తుంది.
"కరోనా సంక్షోభ సమయంలో, లాక్డౌన్ విధించినప్పుడు ప్రాణాంతకమైన ఈ వ్యాధిని ఎదుర్కోవడానికి ప్రజలు పోరాడారు. చుట్టుపక్కల ఉన్న వారి ఉష్ణోగ్రతను గుర్తించడానికి కరోనా అలర్ట్ డివైజ్ను తయారు చేయాలని అప్పుడు మేము నిర్ణయించుకున్నాం."
-అభిజీత్ కుమార్, 12వ తరగతి విద్యార్థి
"ప్రస్తుతం ఉష్ణోగ్రతను గుర్తించే ఇలాంటి డివైజ్కు ఖరీదు మార్కెట్లో రూ.10,000 నుంచి 12,000 వరకు ఉంది. అంత ధరను సామాన్య ప్రజలు భరించలేరు. కానీ సామాన్యుడికి అందుబాటులో ఉంచేందుకే.. రూ.400 నుంచి రూ.600 మధ్య మా గ్యాడ్జెట్ను రూపొందించాము. అయితే ఈ డివైజ్ను దగ్గర ఉంచుకున్నంత మాత్రాన ఇది కరోన వైరస్ను గుర్తించదు. కేవలం వ్యక్తిలోని అధిక ఉష్ణోగ్రతను మాత్రమే కనిపెడుతుంది."
-అర్పిత్ కుమార్, పదవ తరగతి విద్యార్థి
ఈ గ్యాడ్జెట్ తయారు చేసిన విద్యార్థులకు దీనిపై పేటెంట్ హక్కుల్ని జారీచేసింది భారత ప్రభుత్వం.
ఇదీ చదవండి: దేశంలో మరోసారి లక్ష దాటిన కరోనా కేసులు
