దేశవ్యాప్తంగా ప్రాణవాయువు కొరత ఏర్పడిన వేళ.. కేంద్రం కీలక సూచనలు చేసింది. తమ దగ్గర అందుబాటులో ఉండే ఆక్సిజన్ అత్యంత అరుదైన వస్తువుగా పరిగణించాలని ఆస్పత్రులకు సూచించింది. ప్రాణవాయువు దుర్వినియోగం కాకుండా.. వినియోగ పర్యవేక్షణ చేపట్టాలని రాష్ట్రాలను కేంద్రం కోరినట్టు ఆరోగ్యం, కుటుంబ సంక్షేమ శాఖ సంయుక్త కార్యదర్శి లవ్ అగర్వాల్ తెలిపారు. మహమ్మారి ప్రారంభం నుంచే ఆక్సిజన్ సహకారం అందించే పడకలను ప్రధాన ఆరోగ్య కేంద్రాలుగా ప్రభుత్వం గుర్తించిందని ఆయన పేర్కొన్నారు. ఈ మేరకు గతేడాది ఏప్రిల్-మే నెలల్లోనే ప్రభుత్వం.. దేశవ్యాప్తంగా 1.02 లక్షల ఆక్సిజన్ సిలిండర్లను కొనుగోలు చేసి రాష్ట్రాలకు పంపిణీ చేసిందన్నారు.
"అందుబాటులో ఉన్న ఆక్సిజన్ను అత్యంత అరుదైన వస్తువుగా పరిగణించాలి. అందుకోసం.. ప్రాణవాయువును అవసరమైనంత వరకు మాత్రమే ఉపయోగించుకునేలా చర్యలు చేపట్టాలని రాష్ట్రాలను అభ్యర్థించాం. ఆక్సిజన్ సరఫరాను పెంచేందుకు కేంద్రం చర్యలు చేపట్టింది. ద్రవ ఆక్సిజన్ ధరను నిర్ణయించేందుకు నేషనల్ ఫార్మాసూటికల్ ప్రైసింగ్ అథారిటీ(ఎన్పీపీఏ) పలు సూచనలు జారీ చేసింది."
- లవ్ అగర్వాల్, కేంద్రం ఆరోగ్య శాఖ సంయుక్త కార్యదర్శి
దేశవ్యాప్తంగా 154-మెట్రిక్ సామర్థ్యం గల 162 ప్రెజర్ స్వింగ్ అడ్సార్పషన్(పీఎస్ఏ) ప్లాంట్లను మంజూరు చేసినట్టు అగర్వాల్ చెప్పారు. వీటిలో.. ఇప్పటికే 52 ప్లాంట్లను వ్యవస్థీకరించామన్న ఆయన.. మరో 87 ప్లాంట్లను త్వరలోనే ప్రారంభిస్తామన్నారు. అంతేకాకుండా.. ఆయా రాష్ట్రాలకు 8,593 మెట్రిక్ టన్నుల ఆక్సిజన్ను కేటాయించామని ఆయన తెలిపారు.
ఆక్సిజన్ సిలిండర్ల కొరతను తీర్చేందుకు.. ఈ నెల 21న.. 27వేల సిలిండర్ల కొనుగోలుకు ఆర్డర్ ఇచ్చినట్టు పేర్కొన్నారు అగర్వాల్. మరో రెండురోజుల్లో అవి రానున్నాయన్నారు. వీటిలో 54వేల జంబో సిలిండర్లు(డీ-రకం), 73వేల రెగ్యులర్ సిలిండర్లు(బీ-రకం) ఉన్నాయని ఆయన వివరించారు.
ఇదీ చదవండి: 'ఆ రాష్ట్రాల్లో ఐదు రెట్ల వేగంతో కొవిడ్ 2.0 వ్యాప్తి'
