నూతన సాగు చట్టాలకు వ్యతిరేకంగా రైతులు చేస్తున్న ఉద్యమానికి ఏడు నెలలు పూర్తయింది. ఈ నేపథ్యంలో.. ఆందోళనలకు ముగింపు పలికి.. చర్చలకు రావాలని రైతు సంఘాలను కేంద్ర వ్యవసాయ శాఖ మంత్రి నరేంద్ర సింగ్ తోమర్ శనివారం కోరారు. చట్టాలపై మరోమారు చర్చించడానికి ప్రభుత్వం సిద్ధంగా ఉందని ట్విట్టర్ వేదికగా స్పష్టం చేశారు.
"రైతులు తమ ఉద్యమాన్ని ఆపేయాలని కోరుతున్నాను. దేశంలో చాలా మంది ఈ చట్టాలకు మద్దతు తెలుపుతున్నారు. ఈ చట్టాలలోని నిబంధనలపై ఇంకా రైతులకు ఏమైనా సందేహాలు ఉంటే.. వినడానికి, వారితో చర్చించడానికి భారత ప్రభుత్వం సిద్ధంగా ఉంది."
-నరేంద్ర సింగ్ తోమర్, కేంద్ర వ్యవసాయ శాఖ మంత్రి
రైతు సంఘాలతో ఇప్పటివరకు 11సార్లు తాము చర్చలు జరిపామని నరేంద్ర సింగ్ తోమర్ పేర్కొన్నారు. కనీస మద్దతు ధరను ప్రభుత్వం పెంచిందని తెలిపారు.
గతేడాది నవబంర్ 26 నంచి నూతన వ్యవసాయ చట్టాలకు వ్యతిరేకంగా దిల్లీ సరిహద్దులో రైతులు నిరసన చేపట్టారు. పంజాబ్, హరియాణా, పశ్చిమ ఉత్తర్ప్రదేశ్కు చెందిన వేలాది మంది రైతులు ఈ ఆందోళనల్లో పాల్గొన్నారు.
ఇప్పటివరకు ప్రభుత్వానికి, రైతులకు మధ్య 11 సార్లు చర్చలు జరిగాయి. జనవరి 26న రైతులు నిర్వహించిన ట్రాక్టర్ ర్యాలీలో హింసాత్మక ఘటనల తర్వాత నుంచి మళ్లీ చర్చలు జరగలేదు.
ఇదీ చూడండి: రైతుల ఆందోళనల్లో ఉద్రిక్తత- జలఫిరంగుల ప్రయోగం!
ఇదీ చూడండి: రైతు ఆందోళనల్లో ఉగ్రదాడి.. దిల్లీలో హై అలర్ట్!
