తమిళనాడు ఎన్నికల ప్రచారంలో భాగంగా అన్నాడీఎంకేపై మండిపడ్డారు ఎంఐఎం అధినేత అసదుద్దీన్ ఓవైసీ. జయలలిత సారథ్యంలోని అన్నాడీఎంకే.. భాజపాకు దూరంగా ఉండేదని అయితే ప్రస్తుతం ఆ పార్టీ నరేంద్ర మోదీకి బానిసగా మారిందని ఆరోపించారు. చెన్నైలో నిర్వహించిన ప్రచార ర్యాలీలో ఈ మేరకు తీవ్ర వ్యాఖ్యలు చేశారు. ప్రధాన ప్రతిపక్షం డీఎంకేపైనా ఓవైసీ విమర్శలు గుప్పించారు. ఆ పార్టీ కాంగ్రెస్తో పొత్తు పెట్టుకోవడాన్ని ప్రశ్నించారు.
ఏఐఏడీఎంకే ఇక ఎంత మాత్రం మేడం జయలిలత పార్టీ కాదు. ఆమె తన పార్టీని భాజపాకు దూరంగా ఉంచేవారు. దురదృష్టవశాత్తు ఇప్పుడు ఆ పార్టీ ప్రధాని నరేంద్ర మోదీకి తొత్తుగా మారింది.
-అసదుద్దీన్ ఓవైసీ, ఎంఐఎం అధినేత.
దినకరన్తో నా పార్టీ పొత్తు పెట్టుకోవడాన్ని భాజపాకు 'బీ టీం' గా కాంగ్రెస్ నాయకులు అభివర్ణిస్తున్నారని ఓవైసీ తెలిపారు. అయితే మహారాష్ట్రలో శివసేన అధికారంలోకి రావడానికి కాంగ్రెస్ మద్దుతిచ్చిందని గుర్తుచేశారు. దీనికి పరోక్షంగా డీఎంకే సహకరించినట్లేనని.. లౌకికవాదం అంటే ఇదేనా? అని ప్రశ్నించారు.
టీటీవీ దినకరన్ స్థాపించిన ఏఎంఎంకే పార్టీతో ఎఐఎం పొత్తును సమర్థించుకున్న ఓవైసీ.. తమిళనాడు శాసనసభ ఎన్నికల్లో తమ కూటమి విజయం సాధించిస్తుందని ధీమా వ్యక్తం చేశారు. ఈ పొత్తులో భాగంగా.. మజ్లిస్ పార్టీ మూడు చోట్ల తన అభ్యర్థులను నిలబెట్టింది.
ఇదీ చదవండి: కోవిల్పట్టు నుంచి ఎన్నికల బరిలో దినకరన్
